Qeveria ka aktivizuar procedurën për zgjidhjen e kontratës koncesionare të Aeroportit Ndërkombëtar të Vlorës, pas vonesave të përsëritura dhe ngërçit që ka penguar vënien në funksion të projektit.
Scan TV raporton se Ministria e Infrastrukturës dhe Energjisë e ka nisur procedurën gjatë ditës së sotme, duke kaluar në fazën e radhës të mekanizmave të parashikuar në kontratë.
Vendimi vjen pas paralajmërimeve të bëra nga ministria gjatë muajve maj dhe qershor, kur shteti deklaroi se ishte i gatshëm të ndërhynte për zhbllokimin e situatës.
Në muajin maj, ministria theksoi se Aeroporti i Vlorës është një vepër me rëndësi strategjike dhe se funksionalizimi i tij lidhet me interesin publik dhe shtetëror, jo vetëm me marrëdhëniet tregtare mes aksionarëve.
Në fillim të qershorit, kompanive të përfshira në koncesion iu la një afat 30-ditor për zgjidhjen e mosmarrëveshjeve, por situata nuk mori zgjidhje.
Punimet për aeroportin nisën zyrtarisht në nëntor 2021. Sipas planit fillestar, projekti duhej të përfundonte brenda rreth tre viteve dhe fluturimet të nisnin gjatë vitit 2025.
Afatet nuk u respektuan dhe aeroporti vijon të mbetet jashtë funksionit.
Vonesat janë lidhur kryesisht me konfliktin mes aksionarëve të shoqërisë koncesionare, i cili ka sjellë procese gjyqësore, bllokim të vendimmarrjes dhe ngadalësim të punimeve.
Aeroporti i Vlorës konsiderohet një nga investimet më të rëndësishme infrastrukturore në jug të vendit.
Vënia e tij në operim pritet të shtojë lidhjet ajrore me Europën dhe rajonin, të zgjasë sezonin turistik dhe të nxisë investimet e huaja në zonën bregdetare.
