Mbi 40% e popullsisë në Shqipëri jeton në rrezik varfërie ose përjashtimi social, ndërsa vendi vijon të renditet ndër më të prekurit në Evropë nga ky fenomen. Ky është përfundimi i një raporti të Kontrollit të Lartë të Shtetit (KLSH), i cili vë në dukje se, pavarësisht rritjes ekonomike të viteve të fundit, përfitimet nuk janë shpërndarë në mënyrë të barabartë në shoqëri.
Sipas raportit, grupet më të ekspozuara ndaj varfërisë mbeten familjet me fëmijë, prindërit e vetëm, personat me aftësi të kufizuara dhe komunitetet rome e egjiptiane. Të dhënat tregojnë se rreth 40.5% e shqiptarëve janë në rrezik varfërie ose përjashtimi social, pothuajse dyfishi i mesatares së Bashkimit Evropian, e cila është rreth 21%.
KLSH thekson se sistemi i mbrojtjes sociale përballet me sfida të shumta, ndërsa ndryshimet demografike, emigracioni dhe plakja e popullsisë po ushtrojnë presion shtesë mbi politikat sociale. Në raport evidentohet se shumë të moshuar jetojnë vetëm ose me mbështetje të kufizuar, duke rritur rrezikun e izolimit social dhe vështirësive ekonomike.
Raporti nënvizon nevojën për politika më efektive në mbështetje të familjeve në nevojë, forcimin e skemave të mbrojtjes sociale dhe investime që synojnë uljen e pabarazive, në mënyrë që rritja ekonomike të përkthehet në përmirësim të mirëqenies për të gjitha shtresat e shoqërisë.
