Pas rastit të helmimit të dhjetëra kursantëve në Akademinë e Sigurisë, policia ka shpallur në kërkim administratoren e kompanisë së kateringut “SORI–AL” Alma Tafani, e cila është bashkëshortja e biznesmenit të njohur Nikolin Jaka, ndërsa ka arrestuar dy punonjës të saj, të dyshuar për përfshirje në ngjarje.
Sipas të dhënave zyrtare, 56 studentë të Akademisë së Sigurisë u dërguan për ndihmë mjekësore në Repartin Infektiv të QSUT-së, pasi shfaqën simptoma helmimi pas konsumimit të ushqimit në ambientet e institucionit. Të gjithë kanë marrë trajtimin e nevojshëm dhe kanë dalë nga spitali në gjendje të mirë shëndetësore.
Në vijim të hetimeve, specialistët për Hetimin e Krimeve në Komisariatin Nr. 1, nën drejtimin e Prokurorisë së Tiranës, arrestuan në flagrancë shtetasit Kujtim Ballgjini 52 vjeç, me detyrë kuzhinier, dhe Kristjaana Plaka, 23 vjeçe, me detyrë teknologe ushqimi në kompaninë që furnizonte Akademinë me ushqim.
Po ashtu, u referuan materialet për procedim në gjendje të lirë ndaj shtetases R. Ç., 35 vjeçe, gjithashtu teknologe ushqimi në këtë kompani.
Ndërkohë, është shpallur në kërkim administratorja e kompanisë, shtetasja Alma Tafani 52 vjeçe, për të cilën policia po vijon punën për kapjen dhe vënien para përgjegjësisë ligjore.
Dyshimet paraprake të mjekëve janë se helmimi ka ardhur si pasojë e ushqimit të konsumuar nga kursantët, ndërsa kompania “SORI–AL” rezulton të ishte e kontraktuar për furnizimin me katering në Akademinë e Sigurisë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
NJOFTIMI I POLICISË
Tiranë
Dje, janë dërguar për ndihmë mjekësore në Repartin Infektiv të QSUT-së, 56 studentë të Akademisë së Sigurisë, të cilët dyshohet se janë helmuar pas konsumimit të ushqimit në ambientet e Akademisë së Sigurisë.
Të gjithë studentët morën ndihmën e nevojshme mjekësore dhe kanë dalë nga spitali, në gjendje të mirë shëndetësore.
Specialistët për Hetimin e Krimeve të Komisariatit të Policisë Nr. 1, në vijim të veprimeve hetimore të kryera në drejtimin e Prokurorisë së Tiranës, për këtë rast:
-arrestuan në flagrancë shtetasit K. B., 52 vjeç dhe K. P., 23 vjeçe, me detyra respektive kuzhinier dhe teknologe ushqimi në kompaninë e kontraktuar për të ofruar ushqim në Akademinë e Sigurisë;
-referuan materialet në Prokurori ku nisi procedimi në gjendje të lirë për shtetasen R. Ç., 35 vjeçe, me detyrë teknologe ushqimi në këtë kompani;
-shpallën në kërkim administratoren e kompanisë, shtetasen A. T., 52 vjeçe.
Punohet për kapjen e shtetases A. T., individualizimin dhe dokumentimin e përgjegjësisë penale të shtetasve të përfshirë në këtë rast.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
