Kryeministri Edi Rama ka deklaruar se aeroporti ndërkombëtar “Nënë Tereza” në Rinas do të jetë i pari në Europë, ku pasagjerët do të hyjnë përmes portës digjitale, pa iu nënshtruar kontrollit të dokumentave.
“Një tjetër inovacion i bukur që po përgatisim është hyrja në Shqipëri nga aeroporti “Nënë Tereza” pa asnjë ndalesë dhe pa kontroll pasaporte, por përmes një porte digjitale, të cilës i mjafton vetëm pamja për të verifikuar identitetin tënd, duke e lidhur atë elektronikisht me biletën dhe me të dhënat e tua”, tha Rama në podkastin e tij “Flasim’.
Sipas kryeministrit, kjo do ta bëjë Rinasin të parin aeroport në Europë më portën dixhitale të hyrjes.
“Kjo falë bekimit të teknologjisë digjitale, e cila u jep mundësi vendeve në zhvillim të bëjnë kapërcime epokale që, përndryshe, do të ishin të pamundura,” vijoi Rama. /Skyweb.al
