Kundërshtimet ndaj projektit fotovoltaik në Gjoricë e Poshtme ka hyrë tashmë edhe në një përplasje ligjore.
Një grup banorësh të zonës kanë firmosur një prokurë të posaçme noteriale përmes së cilës autorizojnë dy avokatë të ndjekin të gjitha procedurat administrative dhe gjyqësore, lidhur me projektin për ndërtimin e parkut fotovoltaik në fondin pyjor-kullosor të fshatit.
Akti noterial është firmosur më 17 prill 2026 në Peshkopi, pranë një zyre noterie ku disa përfaqësues të familjeve të Gjoricës kanë emëruar si përfaqësues ligjorë dy avokatë.
Sipas dokumentit, avokatët janë autorizuar të ndjekin çdo procedurë administrative pranë institucioneve lokale dhe qendrore për sigurimin e dokumentacionit, lejeve dhe vendimeve që lidhen me sipërfaqen prej 42.5 hektarësh të fondit pyjor dhe kullosor në Gjoricë të Poshtme, ku është planifikuar ndërtimi i parkut fotovoltaik.
Po ashtu, përfaqësuesit ligjorë do të marrin pjesë në mbledhjet e Këshillit Bashkiak të Bulqizës dhe janë autorizuar të përfaqësojnë banorët në çdo shkallë të gjyqësorit për kundërshtimin ose shfuqizimin e vendimeve administrative që lidhen me projektin.
Gjithashtu edhe për të ngritur padi, ankime, kundërpadi, për të kërkuar ekspertime dhe për të ndjekur procesin deri në ekzekutimin përfundimtar të vendimeve.
Ky zhvillim vjen pas muajsh tensionesh dhe debatesh në zonë për përdorimin e tokave në Gjoricë. Në mars të këtij viti, një dëgjesë publike e organizuar nga Këshilli Bashkiak i Bulqizës për dhënien në përdorim edhe të disa hektarëve parcela u shoqërua me kundërshti dhe përplasje nga një pjesë e banorëve.
Në një shkresë zyrtare të datës 30 prill 2026, Këshilli Bashkiak i Këshilli Bashkiak Bulqizë i ka bërë me dije Prefektit të Qarkut Dibër se procesi për dhënien në përdorim të ngastrave 67/b dhe 67/c në ekonominë pyjore Ramnagore për park fotovoltaik është pezulluar pas kundërshtimeve të ngritura nga një pjesë e banorëve të Gjoricës së Poshtme.
Dëgjesa, e mbajtur në Gjoricë të Poshtme, kishte si objekt edhe dhënien në përdorim të rreth 23 hektarëve të tjerë tokë, përveç rreth 42.5 hektarëve të miratuar më herët për një tjetër projekt fotovoltaik.
Takimi u kthye në debate të ashpra mes përfaqësuesve të bashkisë dhe banorëve, të cilët ngritën shqetësime për humbjen e kullotave tradicionale dhe reduktimin e hapësirave për blegtori.
Një pjesë e banorëve kanë pretenduar vazhdimisht se tokat në fjalë janë përdorur ndër breza si prona të përbashkëta të komunitetit dhe se marrja e tyre për panele fotovoltaike rrezikon drejtpërdrejt jetesën e familjeve që mbështeten tek blegtoria.
Në daljet e tyre publike, një pjesë e banorëve të Gjoricë e Poshtme kanë deklaruar se janë ndjerë të mashtruar lidhur me projektin fotovoltaik. Sipas tyre, gjatë konsultimeve fillestare u ishte prezantuar një projekt që do të zinte rreth 1 hektar sipërfaqe, ndërsa më pas rezultoi se vendimi përfundimtar përfshinte rreth 42.5 hektarë tokë pyjore dhe kullosore. Banorët pretendojnë se dakordësia e dhënë në atë kohë është bazuar mbi informacion të pjesshëm dhe jo mbi përmasat faktike të projektit që u miratua më vonë nga institucionet.
Pavarësisht një sërë lejesh të miratuara dhe dritës jeshile nga institucionet qendrore dhe vendore, punimet në terren për “Gjorica Solar Park” nuk kanë nisur ende.
Sipas pasqyrave financiare të vitit 2024, depozitimet e fundit në Qendrën Kombëtare të Biznesit (QKB), kompania rezulton me një humbje prej afro 11 mijë eurosh.
Referuar dokumentit teknik dhe Vendimit nr. 41, datë 29.05.2024 të Këshillit Kombëtar të Territorit, projekti “Gjorica Solar Park” është miratuar si park fotovoltaik me kapacitet të instaluar prej 40 MW.
Sipas planvendosjes teknike, projekti parashikon ndërtimin e paneleve fotovoltaike dhe veprave ndihmëse në një sipërfaqe totale prej rreth 401 mijë metrash katrorë, ose afro 40 hektarë tokë, ndërsa vetëm sipërfaqja e zënë nga panelet arrin në mbi 158 mijë metra katrorë. Dokumenti përcakton gjithashtu ndërtimin e një nënstacioni elektrik 110/35 kV, kabinave elektrike, inverterëve dhe infrastrukturës shoqëruese. Sipas të dhënave teknike, prodhimi vjetor i parashikuar i energjisë arrin në rreth 62.4 milionë kWh në vit.
Projekti është zhvilluar nga shoqëria “Infotelecom Albsolar 4” sh.p.k., ndërsa planvendosja përfshin disa parcela të fondit pyjor dhe kullosor në zonën e Gjoricës.
Mbi 80 kryefamiljarë të Gjoricë e Poshtme kanë firmosur edhe një peticion kundër dhënies së tokave kullosore për park fotovoltaik, duke pretenduar se bëhet fjalë për një pronë të përdorur prej më shumë se 200 vitesh si kullotë e përbashkët.
Ata kërkojnë që të mos lejohet tjetërsimi i sipërfaqes, duke argumentuar se kullotat janë jetike për blegtorinë dhe ekonominë familjare të zonës.
Vetëm pak muaj pasi Këshilli Bashkiak i Bulqizës miratoi dhënien në përdorim të sipërfaqes për parkun fotovoltaik në Gjoricë, kompania “Solar Park Gjoricë” ndryshoi pothuajse tërësisht pronësi.
Sipas të dhënave të QKB-së, shoqëria u themelua në nëntor 2023 nga Sokol Tasha, ndërsa më 8 prill 2024 u realizua transferimi i 97% të kuotave te kompania “GJONAJ GROUP HOLDINGS”.
Në të njëjtën kohë u ndryshua edhe administratori i shoqërisë, duke u larguar Sokol Tasha dhe duke u emëruar Arben Margilaj. Ndryshimet përfshinë gjithashtu adresën e kompanisë, kontaktet zyrtare dhe strukturën e kapitalit.
Ky ndryshim pronësie ndodhi vetëm pak kohë pasi projekti kishte marrë dakordësinë për përdorimin e rreth 42.5 hektarëve tokë pyjore dhe kullosore në Gjoricë, ndërsa një pjesë e banorëve kanë deklaruar publikisht se fillimisht projekti u ishte prezantuar si një investim lokal dhe me përmasa toke në përdorim shumë më të vogla. /bulqizaime.com
