Një studim i ri i Shoqatës Europiane për Studimin e Obezitetit sugjeron se ecja rreth 8500 hapa në ditë mund të jetë çelësi për të shmangur rikthimin e kilogramëve pas dobësimit.
Sipas studiuesve, shumica e personave që humbasin peshë gjatë dietave apo programeve të dobësimit përfundojnë duke rifituar një pjesë ose të gjithë kilogramët e humbur brenda tre deri në pesë viteve.
“Rreth 80% e personave me mbipeshë ose obezitet që humbasin fillimisht peshë, priren të rikthejnë një pjesë ose të gjithë kilogramët më vonë”, tha Marwan El Ghoch, bashkautor i studimit nga Universiteti i Modena dhe Reggio Emilia në Itali.
Sipas tij, gjetja e një strategjie që ndihmon njerëzit të ruajnë peshën e re do të kishte vlerë të madhe klinike.
Studimi analizoi disa prova klinike me afro 4000 pacientë, duke krahasuar personat që ndoqën programe të kombinuara me dietë dhe rritje të aktivitetit fizik me ata që mbajtën vetëm dietë ose nuk morën trajtim.
Rezultatet treguan se grupi që rriti numrin e hapave deri në mesatarisht 8454 hapa në ditë humbi rreth 4.39% të peshës trupore, ose afërsisht 4 kilogramë.
Studiuesit rekomandojnë që personat që ndjekin programe dobësimi të synojnë rreth 8500 hapa në ditë gjatë fazës së humbjes së peshës dhe ta ruajnë këtë nivel aktiviteti edhe më pas, për të shmangur rikthimin e kilogramëve.
Ekspertët paralajmërojnë se obeziteti po rritet me ritme shqetësuese në mbarë botën dhe pritet që deri në vitin 2035 rreth 30% e popullsisë globale të jetë obeze.
Sipas studimit, mbipesha dhe obeziteti lidhen me probleme të shumta shëndetësore dhe psikologjike, rrisin kostot për sistemet shëndetësore dhe ndikojnë drejtpërdrejt në rritjen e rrezikut për sëmundje serioze dhe vdekshmëri.
Një tjetër studim i fundit ka treguar se personat me obezitet kanë 70% më shumë rrezik për infeksione serioze, ndërsa një në dhjetë vdekje nga sëmundjet infektive në botë mund të lidhet me obezitetin. /euronews.com
