Një turist gjerman ka fituar dëmshpërblim pasi paditi një agjenci turistike për shkak të shezlongëve të zënë vazhdimisht me peshqirë në një hotel luksoz në ishullin grek të Kosit.
David Eggert, 48 vjeç, tha se vendosi të ndjekë rrugën ligjore pasi fëmijët e tij u detyruan të shtriheshin në çimento pranë pishinës, sepse të gjithë shezlongët ishin “rezervuar” nga pushues të tjerë me peshqirë.
Sipas tij, në hotelin me pesë yje kishte rreth 400 shezlongë, por që në orët e para të mëngjesit ato ziheshin nga turistët, të cilët më pas largoheshin për në qytet ose ktheheshin në dhomat e tyre për të fjetur.
“Ishte një hotel i madh dhe shumë luksoz me rreth 400 shezlongë. Dhe të gjithë ishin të zënë me peshqirë. Njerëzit nuk i përdornin realisht. Shkonin në qytet ose flinin deri në mesditë dhe kur ktheheshin, shezlongët mbeteshin sërish të zënë”, deklaroi ai për Daily Mail.
Eggert tha se kishte ankesa të vazhdueshme ndaj hotelit dhe agjencisë turistike, por sipas tij askush nuk ndërhyri për të zgjidhur situatën.
Ai pranoi gjithashtu se edhe vetë kishte bërë të njëjtën gjë në të kaluarën, duke argumentuar se prindërit shpesh nuk kanë zgjidhje tjetër nëse duan të mbajnë fëmijët pranë ujit.
“Me dy fëmijë ke vetëm dy zgjedhje: ose zë shezlongun me peshqir, ose nuk gjen fare. Nëse nuk e bën, mbetesh pa vend”, tha ai.
Gjykata vendosi në favor të turistit gjerman dhe argumentoi se nuk është detyrë e pushuesve të konfliktohen me njëri-tjetrin për heqjen e peshqirëve nga shezlongët.
Sipas vendimit, përgjegjësia bie mbi agjencitë turistike dhe hotelet, të cilat duhet të garantojnë një sistem të drejtë përdorimi të shezlongëve dhe një raport të arsyeshëm mes numrit të pushuesve dhe vendeve të disponueshme.
48-vjeçari gjerman mori rreth 900 euro dëmshpërblim, por ai paralajmëroi se ky vendim mund të hapë rrugën për procese të tjera gjyqësore kundër kompanive turistike në Europë.
Sipas tij, fenomeni i “luftës së peshqirëve” është kthyer në problem të zakonshëm në hotele all-inclusive në Spanjë, Itali, Francë dhe Greqi.
“Nëse mijëra turistë nisin të padisin kompanitë turistike për këtë problem, kostot mund të arrijnë miliona euro”, deklaroi ai. /skyweb.al
