Në vitin 2023, kirurgu i përgjithshëm amerikan, Vivek Murthy, paralajmëroi zyrtarisht për “epideminë e vetmisë”, duke deklaruar se një në dy amerikanë ndihen të vetmuar.
Sipas një studimi të vitit 2024 nga Cigna Group, mbi 57% e amerikanëve raportojnë ndjesi vetmie, ndërsa më të prekur rezultojnë pikërisht brezat që jetojnë më shumë online, Gen Z dhe Millennials.
Organizata Botërore e Shëndetësisë paralajmëron se vetmia ka efekte të ngjashme me obezitetin apo duhanpirjen.
Ajo rrit rrezikun për depresion, probleme të zemrës, demencë dhe vdekje të parakohshme. Sipas të dhënave të përfshira në analizë, pothuajse gjysma e personave që përjetojnë vetmi kronike kanë raportuar edhe mendime vetëvrasëse.
Por ndërsa vetmia po përhapet, dikush po fiton miliarda prej saj. Industria e chatbot-eve emocionalë dhe partnerëve virtualë po rritet me ritme të shpejta. Platforma si Character.AI dhe Replika po tërheqin miliona përdorues që kërkojnë thjesht dikë me të cilin të flasin.
Character.AI merr rreth 194 milionë vizita në muaj, ndërsa Replika ka mbi 35 milionë përdorues. Në shumë raste, njerëzit krijojnë lidhje emocionale apo romantike me inteligjencën artificiale.
Rreth 60% e përdoruesve me pagesë të Replika deklarojnë se janë në një marrëdhënie romantike me partnerin e tyre virtual.
Në SHBA janë shfaqur edhe kompani që japin “miq me qira”. Rent-A-Friend funksionon me abonim mujor dhe ofron njerëz që paguhen vetëm për të shoqëruar apo biseduar me klientët.
Ndërkohë aplikacione si Timeleft organizojnë darka mes të panjohurve për të krijuar lidhje reale sociale.
Ekspertët paralajmërojnë se teknologjia mund të zbusë izolimin, por nuk mund të zëvendësojë kontaktin njerëzor.
Dhe ndërsa bota po bëhet gjithnjë e më digjitale, vetmia po kthehet gradualisht në një nga krizat më të mëdha sociale të kohës moderne. /skyweb.al
