Një ish-zyrtar shtetëror i dënuar më parë për korrupsion dhe shpërdorim detyre rezulton të ketë investuar të paktën 155 mijë euro në pasuri të paluajtshme, përmes një skeme pagesash dhe transfertash që Agjencia e Inteligjencës Financiare i konsideron të dyshimta për pastrim parash.
Rasti është përfshirë në Raportin Vjetor 2025 të AIF si një nga tipologjitë e identifikuara gjatë analizës së rasteve të dërguara në organet ligjzbatuese.
Sipas raportit, ish-punonjësi i një institucioni shtetëror, i dënuar më parë për korrupsion dhe shpërdorim detyre, gjatë vitit 2024 kishte nënshkruar kontrata sipërmarrjeje për prenotimin e disa pasurive të paluajtshme. Konkretisht, bëhet fjalë për një apartament me vlerë 60 mijë euro, poste parkimi me vlerë 35 mijë euro dhe një njësi tjetër me vlerë 60 mijë euro, duke e çuar totalin e investimit në rreth 155 mijë euro.
AIF evidenton se fondet nuk rezultonin të krijuara nga të ardhura të qarta personale, por ishin akumuluar në llogaritë bankare përmes depozitimeve dhe transfertave nga persona të tretë, në vlerë rreth 140 mijë euro. Këto para ishin paraqitur në forma të ndryshme si dhurime, hua, likuidime borxhesh apo transferta të tjera, ndërsa lidhjet mes palëve konsideroheshin të paqarta.
Sipas analizës së AIF, disa elementë ngritën dyshime të forta mbi origjinën reale të fondeve dhe mënyrën e përdorimit të tyre. Mes tyre përmenden çmimet e ulëta të pasurive krahasuar me tregun, strukturimi i pagesave nga persona të ndryshëm, mungesa e marrëdhënieve të qarta mes palëve si edhe përqendrimi i transfertave me qëllim përfitimin e pasurive të paluajtshme.
Raporti nuk jep identitetin e ish-zyrtarit dhe as institucionin ku ai ka punuar, por thekson se rasti është referuar për investigim të mëtejshëm në organet e zbatimit të ligjit.
Tipologjia e publikuar nga AIF nxjerr edhe një herë në pah mënyrën se si sektori i pasurive të paluajtshme vijon të konsiderohet një nga kanalet më të përdorura për qarkullimin dhe fshehjen e fondeve me origjinë të dyshimtë. Vetë raporti evidenton se investimet në prona me burime fondesh të paqarta, përdorimi i personave të tretë dhe transfertat e pajustifikuara mbeten ndër indikatorët kryesorë të dyshimeve për pastrim parash në Shqipëri. /skyweb.al
