Ish-drejtoresha e AKSHI-t, Mirlinda Karçanaj, duket se ka zhvendosur vëmendjen drejt ish-zëvendësit të saj, Daniel Shima, gjatë intervistës në emisionin “Top Story” me Grida Duma, në një moment kur Shima rezulton një nga personat që ka dhënë dëshmi në SPAK për dosjen e AKSHI-t.
Karçanaj deklaroi se Daniel Shima kishte përgjegjësi direkte mbi proceset administrative të prokurimeve në institucion, ndërsa vetë ajo ishte e fokusuar në aspektin teknologjik dhe transformimin e AKSHI-t.
“Daniel Shima ka qenë përgjegjës për të gjithë procesin administrativ të procesit të prokurimit. Unë kam qenë e përqendruar të plotësohet procedura teknologjike për t’u bërë AKSHI ky që është sot”, deklaroi ajo.
Sipas Karçanajt, në një periudhë ajo i kishte deleguar edhe autoritetin kontraktor Shimës dhe gjatë asaj kohe nuk kishte pasur komunikime me të lidhur me procedurat e prokurimit.
“Unë personalisht nuk jam marrë me këtë proces, por jam përkushtuar të ndiqet me kujdes që të bëhet brenda rregullave. Në një periudhë unë e kam deleguar autoritetin kontraktor te Daniel Shima dhe gjatë kësaj periudhe nuk kam pasur komunikim në lidhje me këtë procedurë”, u shpreh ajo.
Deklaratat e Karçanajt vijnë në një moment kur emri i Daniel Shimës është përmendur edhe në dosjen hetimore të SPAK, ndërsa ai vetë rezulton të ketë dhënë dëshmi për mënyrën e funksionimit të skemës së dyshuar brenda AKSHI-t.
Sipas materialeve hetimore të administruara nga prokurori Bledar Maksutaj, janë dokumentuar të paktën 200 mijë euro ryshfet që dyshohet se janë përfituar nga Karçanaj përmes një zinxhiri personash të lidhur me strukturën nën hetim.
Në qendër të kësaj skeme, sipas dosjes që ka parë skyweb.al, përmenden emrat e Ergys Agasi dhe Ermal Beqiri, të cilët dyshohet se përdornin kuti shishesh vere për të maskuar kalimin e shumave të parave në euro.
Sipas hetimeve, në disa raste kutitë e verës përmbanin kartëmonedha euro në prerje 100, 200 dhe 500 euro, ndërsa SPAK dyshon se ato janë përdorur për transferimin e ryshfeteve drejt Karçanajt.
Në dosje, Ergys Agasi konsiderohet nga hetuesit si një nga figurat qendrore të grupit të strukturuar kriminal që dyshohet se kontrollonte tenderat e AKSHI-t.
Karçanaj, e cila ndodhet në masë sigurie “arrest shtëpie”, deklaroi në intervistë se nuk dëshiron të paragjykojë Daniel Shimën, por shtoi se institucionet duhet të hetojnë seriozisht gjithçka që është publikuar dhe raportuar. /skyweb.al
