Nga telefonat dhe kuletat deri te frigoriferët, akuariumet dhe fustanet e nusërisë, pasagjerët harrojnë në taksi sende nga më të ndryshmet.
Një raport ndërkombëtar mbi sendet e humbura gjatë udhëtimeve me Uber ka renditur objektet më të zakonshme, por edhe ato më të pazakonta që janë gjetur në sediljet e pasme.
Mes rasteve më të çuditshme janë një frigorifer i vogël i papërdorur, dy fustane nusërie, një akuarium 280 litra, peshq të gjallë, dy pemë, një manekin, 420 petulla të ëmbla dhe një bombol oksigjeni.
Megjithatë, shumica e sendeve të harruara janë shumë më të zakonshme.
Në krye të listës qëndrojnë telefonat celularë, të ndjekur nga kuletat, bagazhet, çelësat, kufjet, veshjet, pasaportat, syzet, bizhuteritë dhe laptopët.
Të dhënat tregojnë se e diela është dita kur pasagjerët harrojnë më shpesh sendet personale në taksi.
Çdo ditë e javës lidhet edhe me një kategori të caktuar objektesh. Të hënën harrohen më shpesh dokumentet e identifikimit dhe kuletat, të martën kufjet, ndërsa të mërkurën karikuesit.
Të enjten pasagjerët lënë më shpesh çantat, të premten çelësat, të shtunën telefonat dhe të dielën syzet.
Raporti tregon se zakonet e pasagjerëve ndryshojnë sipas ditës së javës, ndërsa sendet e pazakonta të gjetura në automjete vazhdojnë të surprizojnë drejtuesit e taksive. /skyweb.al
