Ndërsa tregjet globale vijojnë të fokusohen te kriza e naftës dhe tensionet në Lindjen e Mesme, ekspertët paralajmërojnë se një krizë shumë më e rrezikshme po zhvillohet në heshtje: ajo e plehrave kimike, që mund të godasë drejtpërdrejt prodhimin ushqimor dhe çmimet në mbarë botën.
Sipas raportimeve ndërkombëtare, Kina ka nisur të ndërtojë rezerva strategjike të plehrave fosfatike dhe azotike, duke kufizuar eksportet dhe duke devijuar sasitë drejt depove shtetërore. Lëvizja po krijon tronditje në zinxhirin global të furnizimit dhe po rrit frikën për mungesa të mëdha në sezonet e ardhshme bujqësore.
Ekspertët paralajmërojnë se ndikimi i një krize të plehrave kimike mund të jetë shumë më i rëndë se ai i naftës, pasi plehrat konsiderohen baza e prodhimit ushqimor global. Rreth gjysma e prodhimit bujqësor në botë varet drejtpërdrejt nga përdorimi i tyre. Nëse mungojnë plehrat, nuk preket vetëm transporti apo industria, por vetë prodhimi i ushqimeve.
Alarmi është ngritur edhe në SHBA, ku senatorë dhe organizata bujqësore kanë deklaruar se fermerët po përballen me kosto të papërballueshme. Çmimi i uresë është rritur me 55% që nga shkurti, ndërsa kostot e plehrave të tjera dhe karburantit bujqësor janë rritur ndjeshëm.
Edhe Europa po hyn në një periudhë pasigurie. Fermerët europianë siguruan rezervat për sezonin pranveror para përshkallëzimit të krizës, por shqetësimi tani lidhet me mbjelljet e vjeshtës dhe furnizimet për muajt e ardhshëm.
Komisioni Europian pritet të prezantojë një plan të ri për mbështetjen e prodhimit të plehrave kimike dhe ndihmën ndaj fermerëve, por organizatat bujqësore paralajmërojnë se masat aktuale nuk mjaftojnë përballë përmasave të krizës.
Edhe Organizata e Kombeve të Bashkuara për Ushqimin dhe Bujqësinë ka paralajmëruar se mungesa e plehrave kimike do të prekë korrjet e ardhshme dhe furnizimin global me ushqime, duke rritur rrezikun për një valë të re shtrenjtimi në supermarketet në të gjithë botën.
