Administrata Tatimore ka publikuar afatet për subjektet që përfitojnë nga ligji i faljes së detyrimeve tatimore dhe doganore, si edhe nga paqja fiskale.
Sipas njoftimit, më 10 qershor 2026 nis pagesa e detyrimeve për përfitimin nga ligji i faljes. Deri më 30 qershor 2026, subjektet mund të paguajnë 50% të detyrimit principal për periudhën 2015–2019, duke përfituar fshirjen e gjysmës së mbetur. Po deri në këtë datë duhet të dorëzohen edhe deklaratat e padorëzuara deri më 31 dhjetor 2024 për të shmangur gjobat e vonesës.
Afati i fundit për heqjen dorë nga ankimimi pranë Drejtorive Rajonale Tatimore është 30 nëntori 2026.
Ndërsa deri më 31 dhjetor 2026, subjektet mund të paguajnë 75% të principalit për të përfituar fshirjen e 25% të mbetur për detyrimet e viteve 2015–2019, si dhe të shlyejnë principalin e plotë për periudhën 2020–2024, duke përfituar faljen e gjobave dhe kamatëvonesave.
Për paqen fiskale, aplikimet në sistemin “e-Filing” kanë nisur më 15 maj 2026 dhe mbyllen më 5 qershor 2026. Ndërsa deri më 15 qershor duhet të ngarkohet marrëveshja e nënshkruar nga subjektet që aplikojnë në ditën e fundit.
Po ashtu, 30 qershori 2026 është afati final për rideklarimin e pasqyrave financiare, pagesën e tatimeve përkatëse dhe dorëzimin e dokumentacionit pranë administratës tatimore. /skyweb.al
