Biznesmeni Gentian Likaj, pronar i kompanisë “Communication Progress”, është paraqitur këtë të mërkurë në Prokurorinë e Posaçme, në kuadër të hetimeve për dosjen e madhe të AKSHI-t.
Likaj nuk është thjesht një emër periferik në dosjen AKSHI, përkundrazi, hetimet e SPAK kanë treguar se ai ndodhet në zemër të saj, si njeriu i besuari i Ermal Beqirit, ndërsa vijon të marrë ende pagesa nga AKSHI edhe tani.
Gentian Likaj është nën hetim nga SPAK dhe po verifikohet në mënyrë të thelluar për rolin e tij të dyshuar në skemën e tenderave të Agjencisë Kombëtare të Shoqërisë së Informacionit.
Gentian Likaj njihet si kunati i Ermal Beqirit, një prej figurave kyçe të dosjes së AKSHI-t, i cili vijon të jetë në kërkim. Referuar provave të deritanishme, që lidhen kryesisht me dëshmi dhe lëvizjen e parave, Likaj dhe kompania e tij “Communication Progress” dyshohet se kanë qenë pjesë e rrethit të kompanive që përfitonin nga tenderat e AKSHI-t përmes procedurave të manipuluara dhe kritereve të paracaktuara.
SPAK po heton çështjen në kuandrin e një grupi të strukturuar kriminal, i cili ka orientuar tenderat publikë të AKSHI-t drejt kompanive të lidhura me rrjetin, duke kufizuar konkurrencën dhe duke krijuar kushte për përfitime të paligjshme nga fondet publike.
Në këtë dosje, Prokuroria e Posaçme ka ngritur dyshime për korrupsion, manipulim tenderash, përdorim të kompanive të lidhura dhe riciklim fondesh përmes faturave fiktive. Në kërkim vijojnë të jenë Ergys Agasi dhe Ermal Beqiri, ndërsa ish drejtuesja e AKSHI-t, Mirlinda Karçanaj, është paraqitur një ditë më parë në SPAK në zbatim të masës “detyrim paraqitje”.
Por ndërkohë që Gentian Likaj po hetohet nga SPAK si pjesë e kësaj skeme, të dhënat e Thesarit tregojnë se kompania e tij ka vijuar të marrë pagesa nga AKSHI edhe gjatë muajit maj.
Sipas të dhënave të publikuara në sistemin e Thesarit dhe të aksesueshme përmes OpenSpending Albania, vetëm gjatë muajit maj 2026, “Communication Progress” ka marrë nga AKSHI 13.603.200 lekë.
Pagesa më e fundit rezulton e ekzekutuar më 13 maj 2026, vetëm pak ditë përpara paraqitjes së Gentian Likës në SPAK. Shuma është 324.000 lekë dhe lidhet me “ngritjen e sistemit të menaxhimit të informacionit për startup-et dhe lehtësuesit”.
Nga të dhënat e Thesarit rezulton se gjatë muajit maj, AKSHI ka kryer disa pagesa për “Communication Progress”, kryesisht për mirëmbajtje sistemesh dhe shërbime teknologjike.
Ky fakt ngre pikëpyetje të forta mbi vijimin e pagesave publike ndaj një kompanie, pronari i së cilës është nën hetim nga SPAK si pjesë e dosjes së AKSHI-t. Edhe më problematik është fakti se pagesat kanë vijuar pas operacionit të Prokurorisë së Posaçme dhe pas sekuestrimit të pasurive me vlerë të madhe që lidhen me të pandehurit e kësaj çështjeje.
Në fund të muajit prill, SPAK sekuestroi 52 prona, llogari bankare dhe pasuri të tjera me vlerë rreth 40 milionë euro, që sipas hetimit lidhen me personat e përfshirë në dosjen e AKSHI-t.
Gentian Likaj doli më qartë në skenë pas zgjerimit të hetimeve nga prokurorët Bledar Maksuti dhe Altin Dumani. Sipas të dhënave të dosjes që ka parë skyweb.al, ai figuron si person nën hetim për vepra që lidhen me korrupsionin dhe përfshirjen në strukturë të organizuar kriminale.
Kompania e tij “Communication Progress” përmendet si një nga subjektet që dyshohet se kanë përfituar nga skema e tenderave të AKSHI-t. Sipas hetimeve, këto kompani dyshohet se fitonin kontrata publike përmes tenderëve të para caktuar dhe më pas një pjesë e fondeve riciklohej përmes faturave fiktive apo shërbimeve të dyshuara si të sajuara.
Skema sipas SPAK, nuk ishte thjesht një rast korrupsioni i izoluar, por një mekanizëm i organizuar për kontrollin e tenderave publikë në fushën e teknologjisë. Në qendër të saj qëndronin zyrtarë, ish zyrtarë, biznesmenë dhe kompani të lidhura mes tyre, të cilat dyshohet se përfitonin fonde publike përmes procedurave të paracaktuara.
Në këtë kuadër, paraqitja e Gentian Likës në SPAK merr një rëndësi të veçantë. Ai nuk po shihet më vetëm si përfitues tenderash, por si një nga personat që Prokuroria po e heton për të kuptuar rolin e tij në skemën e dyshuar të AKSHI-t dhe lidhjet me Ermal Beqirin.
Megjithatë, deri në një vendim të formës së prerë, Gentian Likaj gëzon prezumimin e pafajësisë.
Fakti i verifikueshëm mbetet se ndërsa ai është nën hetim nga SPAK, kompania e tij ka vijuar të marrë pagesa nga AKSHI edhe në maj, me një pagesë të fundit të ekzekutuar vetëm pak ditë përpara paraqitjes së tij në Prokurorinë e Posaçme. /skyweb.al
