Rritja e çmimeve është përshpejtuar gjatë muajve të fundit, duke u reflektuar edhe në inflacionin e matur me Indeksin e Harmonizuar të Çmimeve të Konsumit. Në muajin prill 2026, inflacioni sipas këtij treguesi arriti në 2.8%, në të njëjtin nivel me normën e publikuar më herët nga INSTAT.
Të dhënat tregojnë se presioni mbi çmimet nuk ka ardhur vetëm nga transporti dhe karburantet, por edhe nga shërbime të tjera që lidhen drejtpërdrejt me konsumin e përditshëm dhe aktivitetet e kohës së lirë. Ndryshe nga matja e mëparshme e INSTAT, ku rritja më e lartë ishte evidentuar në grupin e transportit, Indeksi i Harmonizuar i Çmimeve të Konsumit tregon se shtrenjtimi më i madh në prill është regjistruar te grupi “Argëtim, sport dhe kulturë”.
Sipas të dhënave, të cilave u është referuar Monitor, ky grup shënoi rritjen më të lartë vjetore, me 6.6%. Pas tij renditet transporti, me një rritje prej 4.1%, i ndikuar nga çmimet më të larta të karburanteve krahasuar me një vit më parë. Rritje të ndjeshme pati edhe grupi “Pije alkoolike dhe duhan”, me 4.0%, si dhe “Kujdesi personal, mbrojtja sociale dhe mallra e shërbime të ndryshme”, me 3.6%.
Çmimet në grupin “Restorante dhe shërbime akomodimi” u rritën me 3.0%, duke reflektuar presionin që vjen nga sektori i shërbimeve, sidomos në një periudhë kur vendi po hyn gradualisht në sezonin turistik. Ndërkohë, “Sigurime dhe shërbime financiare” u shtrenjtuan me 2.7%, ndërsa “Mobilie, pajisje shtëpie dhe mirëmbajtje e shtëpisë” dhe “Shërbimi arsimor” shënuan rritje me nga 2.6% secili.
Edhe grupi “Ushqime dhe pije joalkoolike”, një nga zërat më të ndjeshëm për buxhetet familjare, u rrit me 2.2% krahasuar me prillin e vitit të kaluar. Më të ulëta ishin rritjet në grupin “Qira, ujë, energji elektrike, gaz dhe karburante të tjera”, me 1.7%, “Veshje dhe këpucë”, me 1.0%, “Shëndeti”, me 0.7%, dhe “Informacioni dhe komunikimi”, me 0.5%.
Në krahasim me muajin mars, çmimet e konsumit në prill u rritën me 0.3%. Rritja mujore u ndikua kryesisht nga shtrenjtimi i pijeve alkoolike dhe duhanit, me 1.4%. Pas këtij grupi, rritje shënuan “Kujdesi personal, mbrojtja sociale dhe mallra e shërbime të ndryshme”, me 0.7%, “Restorante dhe shërbime akomodimi”, me 0.6%, si dhe “Shërbimi arsimor”, me 0.4%.
Në të njëjtën periudhë, grupet “Ushqime dhe pije joalkoolike”, “Qira, ujë, energji elektrike, gaz dhe karburante të tjera” dhe “Argëtim, sport dhe kulturë” u rritën me nga 0.2% secili. Rritje më të lehta, me 0.1%, patën edhe “Shëndeti” dhe “Informacioni dhe komunikimi”.
Nga ana tjetër, transporti shënoi ulje mujore me 0.4%, pavarësisht se në krahasim vjetor mbetet një nga grupet me rritjen më të lartë të çmimeve. Ulje të lehta mujore u regjistruan edhe te “Veshje dhe këpucë” dhe “Mobilie, pajisje shtëpie dhe mirëmbajtje e shtëpisë”, me nga 0.1% secili.
Indeksi i Harmonizuar i Çmimeve të Konsumit mat ndryshimin e nivelit të çmimeve me pakicë të mallrave dhe shërbimeve, duke marrë në konsideratë strukturën e shpenzimeve të konsumatorëve vendas dhe të huaj për konsumin final në territorin e Shqipërisë. Ky tregues përdoret për monitorimin e lëvizjes së çmimeve me pakicë në vendet evropiane dhe mundëson krahasimin e inflacionit ndërmjet vendeve.
Ndryshimi vjetor mat diferencën e indeksit të çmimeve ndërmjet muajit aktual dhe të njëjtit muaj të vitit të mëparshëm. Ky ndryshim pasqyron lëvizjet korrente të çmimeve, por mund të ndikohet edhe nga faktorë të përkohshëm ose efekte të papërsëritshme të muajve të caktuar.
