Qeveria ka ndërmarrë një nismë të re ligjore që synon të përmirësojë kuadrin rregullator për pagesat e vonuara në transaksionet tregtare, duke e përafruar plotësisht atë me standardet e Bashkimit Evropian.
Projektligji i Ministrisë së Ekonomisë dhe Inovacionit vjen në kuadër të procesit të integrimit europian dhe harmonizimit me direktivën e BE, e cila synon luftimin e praktikave të pagesave me vonesë mes bizneseve dhe autoriteteve publike.
Ndryshimet ligjore prekin disa elementë kyç të ligjit ekzistues, duke nisur nga përkufizimet bazë. Zgjerohet koncepti i “sipërmarrjes”, duke përfshirë jo vetëm shoqëritë tregtare, por edhe personat fizikë dhe profesionet e lira, me qëllim trajtim më gjithëpërfshirës të marrëdhënieve tregtare.
Po ashtu, rishikohen normat e interesit dhe saktësohet mënyra e llogaritjes së kamatëvonesës, duke përcaktuar qartë edhe rastet kur ajo lind automatikisht në përputhje me afatet ligjore.
Një nga ndryshimet më të rëndësishme lidhet me afatet e pagesave, ku parashikohet që ato të mos tejkalojnë 30 deri në 60 ditë kalendarike, ndërsa procedurat e kolaudimit për mallra apo shërbime kufizohen deri në 30 ditë.
Në rast të vonesës, kamatëvonesa do të aplikohet automatikisht, duke synuar disiplinim më të madh financiar dhe mbrojtje të likuiditetit të bizneseve, veçanërisht të ndërmarrjeve të vogla dhe të mesme, të cilat janë më të ekspozuara ndaj problemeve të cash floë.
Projektligji gjithashtu sjell ndryshime edhe në aspektin procedural gjyqësor, duke parashikuar që gjykatat të lëshojnë urdhër ekzekutimi brenda 90 ditëve për faturat e papaguara, në rastet kur debia nuk kundërshtohet.
Sipas relacionit shoqërues, këto ndryshime synojnë jo vetëm përmirësimin e klimës së biznesit në vend, por edhe avancimin e Shqipërisë në procesin e integrimit europian./Scan
