Ka shumë arsye për t’u shpërngulur jashtë vendit, nga mundësitë për punë dhe bashkimi me partnerin/en, deri te dëshira për të jetuar diku me mot më të mirë. Nëse keni nevojë për pak orientim për të vendosur se ku të shkoni, kemi lajm të mirë: Indeksi i Emigracionit 2026 i Remitly sapo është publikuar.
Indeksi vlerëson 82 shtete sipas 34 treguesve, duke përfshirë koston e jetesës në aspektin e ushqimit, qirasë, kredive hipotekore dhe fuqisë blerëse, si dhe kulturën, sistemin arsimor, lumturinë, kujdesin shëndetësor, sigurinë dhe pagat.
Këtë vit, Zvicra u rendit në vendin e parë, pasi kishte qenë e dyta në vitin 2025. “Zvicra dallohet për potencialin e jashtëzakonshëm të fitimeve (renditet e para në botë për këtë kategori), aksesin e fortë në kujdesin shëndetësor, standardet e larta të sigurisë dhe mundësitë e mëdha për të ardhura,” shkroi Remitly në renditje.
“Tërheqja e Zvicrës shtohet edhe nga një komunitet i mirë-integruar emigrantësh dhe infrastruktura publike e zhvilluar. Vlerësimet e larta në treguesit e rinj, si numri i shkollave ndërkombëtare dhe furnizimi me energji, i kanë siguruar Zvicrës vendin e parë.”
Nuk ka një zgjidhje universale kur bëhet fjalë për zgjedhjen e vendit ku do të jetoni, por ja disa nga vendet më të vlerësuara në botë.
Vendet më miqësore për emigrantët në vitin 2026
Menjëherë pas Zvicrës, Islanda u rendit e dyta, pasi kishte mbajtur vendin e parë vitin e kaluar.
Remitly vlerësoi vendin nordik për potencialin e të ardhurave, sigurinë dhe performancën mjedisore, duke theksuar se numri më i ulët i shkollave ndërkombëtare shpjegon rënien në renditje.
“Me politika të forta familjare dhe një nga popullsitë më të lumtura në botë, Islanda u ofron emigrantëve një cilësi të lartë jetese në një shoqëri të lidhur ngushtë,” shtoi Remitly.
Vendin e tretë e zuri Luksemburgu, falë potencialit të lartë për të ardhura, niveleve të larta të sigurisë dhe transportit publik të shkëlqyer, duke e bërë shumë tërheqës për ata që kërkojnë “stabilitet, lëvizshmëri dhe standard të lartë jetese në zemër të Europës”.
I vetmi shtet në pesëshen e parë jashtë Europës ishte Australia, e cila u rendit e katërta falë “komunitetit mikpritës të emigrantëve, potencialit të fortë ekonomik dhe stilit të jetesës të orientuar drejt aktiviteteve në natyrë”.
Pesëshen e parë e plotëson Gjermania, të cilën Remitly e quajti “një zgjedhje të besueshme për emigrantët që kërkojnë mundësi në ekonominë më të madhe të Europës, e mbështetur nga mbrojtje të forta për punëtorët dhe perspektiva afatgjata karriere”.
Ky vend është gjithashtu shtëpia e disa prej qyteteve më të përballueshme për blerjen e pronës.
10 vendet më të mira për t’u shpërngulur:
- Zvicra
- Islanda
- Luksemburgu
- Australia
- Gjermania
- Irlanda
- SHBA
- Danimarka
- Norvegjia
- Spanja
Vendet më të mira për familjet
Duke analizuar tregues si sistemi arsimor, leja e lindjes për nënat dhe baballarët, kostot vjetore të kujdesit për fëmijët dhe numri i shkollave ndërkombëtare, Spanja doli në vendin e parë.
“Me një infrastrukturë të fortë sociale, ky vend europian vazhdon të dallohet si një destinacion për familjet që kërkojnë stabilitet dhe mundësi jashtë vendit,” tha Eva Borislavova, CEO e Remitly Europe.
“Për shumë njerëz, ky kombinim i aksesit, mbështetjes dhe cilësisë së jetës e bën Spanjën një zgjedhje gjithnjë e më tërheqëse.”
Përveç Spanjës, vetëm tre vende të tjera europiane hynë në top 10 të kësaj kategorie: Mbretëria e Bashkuar në vendin e tetë, Islanda në të nëntin dhe Kroacia në të dhjetin.
Pjesa tjetër e listës përfshin Kinën (e dyta), SHBA-në (e treta), Sri Lankën (e katërta), Emiratet e Bashkuara Arabe (e pesta), Australinë (e gjashta) dhe Bangladeshin (i shtati).
Vendet me ekuilibrin më të mirë të kostos së jetesës
Renditja e Remitly analizoi gjithashtu cilat vende ofrojnë balancën më të mirë të kostos së jetesës duke marrë parasysh fuqinë blerëse, kostot e kredive hipotekore si përqindje e të ardhurave, raportin mes qirasë dhe pagës, si dhe koston mesatare të ngrënies jashtë.
Arabia Saudite doli në vendin e parë, falë pagave të forta krahasuar me kostot e jetesës dhe barrës më të ulët të strehimit për pronarët e shtëpive. (Shënim: Të dhënat janë mbledhur para sulmit SHBA-Izrael ndaj Iranit.)
Në Europë, Norvegjia u rendit më lart për balancën e kostos së jetesës, duke zënë vendin e katërt, e ndjekur nga afër nga Danimarka në vendin e pestë.
Luksemburgu u rendit i teti, ndërsa Irlanda e nënta.
Vendet e tjera në top 10 janë Bangladeshi (i dyti), SHBA (e treta), Omani (i gjashti), Pakistani (i shtati) dhe Nepali (i dhjeti).
