Kreu i SPAK, Klodjan Braho, ka dhënë detaje mbi operacionin e përbashkët të zhvilluar me autoritetet italiane, i cili ka çuar në ekzekutimin e 15 masave të sigurisë ndaj personave të dyshuar për përfshirje në veprimtari të krimit të organizuar.
Në një konferencë të përbashkët me Antimafian italiane, Braho tha se hetimi nuk është fokusuar vetëm te goditja e aktivitetit kriminal të lidhur me trafikun e drogës, por edhe te pasuritë e krijuara nga kjo veprimtari e paligjshme.
Sipas tij, gjatë hetimeve paraprake janë sekuestruar rreth 1 milion euro para cash, si edhe pasuri të tjera që dyshohet se burojnë nga aktivitet kriminal. Mes tyre përfshihen llogari bankare dhe shoqëri tregtare, të cilat janë vendosur nën sekuestro me vendim të GJKKO.
“Ky është një rezultat i përbashkët. Në lidhje me këtë çështje janë ekzekutuar 15 masa, 10 janë ekzekutuar nga Gjykata e Shkallës së Parë në Tiranë”, tha Braho.
Ai theksoi se një element i rëndësishëm i këtij rasti është ndjekja e produktit financiar të krimit, jo vetëm goditja penale e personave të përfshirë.
“Është një element i rëndësishëm i këtij rasti, jo vetëm goditja e këtij aktiviteti të krimit të organizuar të drogës, por dhe produkti i krijuar nga ky aktivitet i paligjshëm. Gjatë hetimeve paraprake janë sekuestruar rreth 1 milion euro para në gjendje cash. Po kështu nga GJKKO në Tiranë janë sekuestruar pasuri të tjera, llogari bankare, shoqëri, që dyshohet se janë krijuar nga veprimtari kriminale”, deklaroi kreu i SPAK.
Braho e lidhi këtë operacion edhe me disa hetime të mëparshme të zhvilluara në bashkëpunim me autoritetet italiane, duke përmendur operacionet “Shpirti”, “Kulmi” dhe “Ura”.
Sipas tij, në këto operacione janë dënuar penalisht 167 persona, ndërsa për 145 prej tyre janë dhënë dënime të konsiderueshme, që variojnë nga 12 deri në 20 vite burg.
Operacioni i fundit shihet si pjesë e bashkëpunimit të vazhdueshëm mes SPAK dhe strukturave italiane kundër krimit të organizuar, me fokus të veçantë jo vetëm ndjekjen penale të grupeve kriminale, por edhe goditjen e pasurive të krijuara prej tyre.
