Kriza e banesave po kthehet në një nga problemet më të mëdha sociale dhe politike në Europë. Në një shkrim të fundit, The Economist e lidh drejtpërdrejt zemërimin e votuesve europianë me faturat e qirave, të cilat në shumë qytete janë bërë gjithnjë e më të papërballueshme.
Problemi ndihet sidomos në qytetet e mëdha, ku kërkesa për banesa me qira është shumë më e lartë se oferta. Në Barcelonë, sipas shembullit të sjellë nga revista britanike, një apartament i publikuar online mund të marrë qindra kërkesa brenda pak minutash dhe të jepet me qira brenda ditës.
Kjo situatë nuk prek vetëm zonat e preferuara nga të huajt, nomadët digjitalë apo ata që kërkojnë një shtëpi të dytë në qytetet mesdhetare. Presioni është edhe më i fortë në shtresat me të ardhura të ulëta, ku në periferi të Barcelonës dhe Madridit raportohet se konkurrenca për një dhomë me qira është bërë ekstreme.
Rritja e qirave po rëndon sidomos të rinjtë, familjet me të ardhura mesatare dhe punonjësit që jetojnë në qytete ku pagat nuk kanë ndjekur ritmin e çmimeve të banesave. Për shumë prej tyre, qiraja është kthyer në shpenzimin kryesor mujor, duke lënë gjithnjë e më pak hapësirë për kursime, konsum apo krijimin e një familjeje.
Në shumë vende europiane, qeveritë janë përpjekur të përgjigjen me politika të kontrollit të qirave. Por këto masa kanë hapur një debat të fortë. Mbështetësit e tyre thonë se ato mbrojnë qiramarrësit nga rritjet e menjëhershme të çmimeve. Kritikët argumentojnë se kufizimet mbi qiratë mund të ulin interesin e pronarëve për të nxjerrë banesa në treg dhe të frenojnë ndërtimet e reja.
Në thelb, problemi kryesor mbetet mungesa e banesave të disponueshme. Nëse oferta nuk rritet, çdo ndërhyrje mbi çmimin mund të japë lehtësim të përkohshëm për një pjesë të qiramarrësve, por nuk e zgjidh krizën për ata që kërkojnë një banesë të re.
Kostoja e lartë e strehimit po kthehet edhe në çështje elektorale. Në qytetet ku qiratë janë rritur më shpejt, pakënaqësia ndaj qeverive dhe partive tradicionale është bërë më e dukshme. Për shumë qytetarë, kriza e banesave nuk është më një problem i tregut, por një tregues se sistemi nuk po u ofron më siguri ekonomike.
Kjo e bën çështjen e strehimit një nga temat më të ndjeshme politike në Europë. Qiratë e larta nuk po ndikojnë vetëm buxhetet familjare, por edhe mënyrën se si votuesit e shohin shtetin, ekonominë dhe partitë që kërkojnë t’i përfaqësojnë. /skyweb.al
