Japonia po përballet me një fenomen të pazakontë të shkaktuar nga rritja e fortë e turizmit. Në hotele, aeroporte dhe zona turistike po shtohen rastet e valixheve të braktisura nga vizitorët e huaj.
Fenomeni njihet në Japoni si “hōchi sūtsukēsu”, që do të thotë valixhe të braktisura. Bëhet fjalë për bagazhe bosh, të dëmtuara ose të panevojshme, të cilat turistët i lënë pas largimit nga vendi.
Japonia ka shënuar rekord vizitorësh gjatë vitit 2025. Më shumë se 42 milionë turistë kanë vizituar vendin, me një rritje mbi 15.8 për qind krahasuar me vitin 2024. Për herë të parë, numri i vizitorëve të huaj ka kaluar kufirin e 40 milionëve.
Por bashkë me të ardhurat nga turizmi, autoritetet japoneze po përballen edhe me pasoja praktike. Një prej tyre është menaxhimi i mijëra valixheve që lihen në hotele, aeroporte, stacione transporti dhe hapësira publike.
Sipas mediave japoneze, një pjesë e turistëve i braktisin valixhet kur zbulojnë se ato nuk plotësojnë përmasat e lejuara për bagazhin e dorës. Të tjerë blejnë shumë më tepër produkte nga sa kishin planifikuar, përfshirë suvenire, ushqime, produkte tradicionale, artikuj artizanalë dhe dhurata.
Si pasojë, ata blejnë valixhe të reja më të mëdha dhe i lënë të vjetrat në hotel apo në aeroport.
Problemi është bërë veçanërisht i dukshëm në qendrat kryesore turistike dhe në aeroportet ndërkombëtare. Në Narita, një nga portat kryesore hyrëse drejt Tokios, numri i valixheve të braktisura është rritur nga 338 në vitin 2021 në 1,073 në vitin 2024. Vetëm gjatë periudhës janar qershor 2025 janë regjistruar rreth 400 valixhe të braktisura.
Në aeroportet Narita, Kansai dhe Chubu, autoritetet raportojnë se rastet janë shtuar pas lehtësimit të kufizimeve të vendosura gjatë pandemisë COVID 19.
Në disa aeroporte janë vendosur njoftime në japonisht dhe anglisht, ku turistëve u bëhet e qartë se braktisja e valixheve është e ndaluar. Në Chubu është ngritur edhe një program për pranimin e bagazheve të padëshiruara kundrejt një tarife prej 1,200 jenësh, rreth 6.5 euro.
Për hotelet, kjo praktikë nuk është thjesht bezdi, por edhe kosto. Valixhet konsiderohen objekte të mëdha dhe trajtimi i tyre kërkon procedura të posaçme nga autoritetet bashkiake. Kur një bagazh braktiset, ai duhet të trajtohet fillimisht si send i humbur dhe të ruhet për një periudhë të caktuar, në rast se pronari kthehet për ta kërkuar.
Por sipas të dhënave të raportuara, vetëm rreth 10 për qind e pronarëve kthehen për të marrë valixhet.
Në aeroporte, problemi është edhe më serioz. Çdo bagazh i braktisur duhet të kontrollohet fillimisht si rrezik i mundshëm sigurie, para se të kalojë në sistemin e sendeve të humbura. Kjo shton ngarkesën për shërbimet e sigurisë, sidomos në periudhat me fluks të lartë udhëtarësh.
Për të ulur këtë problem, në Japoni po promovohen shërbimet e udhëtimit pa bagazhe, ku valixhet transportohen drejtpërdrejt në hotel ose në aeroport. Synimi është që turistët të mos detyrohen t’i mbajnë vetë bagazhet gjatë lëvizjeve në qytete.
Ndërkohë, disa hotele kanë zgjedhur zgjidhje më kreative. Disa valixhe të braktisura po ripërdoren si hapësira magazinimi ose si vazo të improvizuara për bimë dhe perime.
Në Hotel Niwa Tokyo, valixhet e lëna në dhomat e klientëve pas largimit përdoren si vazo për kultivimin e specave dhe dhjetëra llojeve të tjera perimesh.
Fenomeni i valixheve të braktisura tregon një nga anët më pak të dukshme të turizmit masiv. Në një vend të njohur për pastërtinë, rregullin dhe organizimin, fluksi rekord i vizitorëve po krijon probleme të reja, të cilat autoritetet duhet t’i menaxhojnë çdo ditë. /skyweb.al
