Një konflikt mes ortakëve të kompanisë “Finman” shpk ka degraduar në dhunë fizike gjatë mbledhjes së Bordit Drejtues, të zhvilluar këtë të enjte, më 28 maj 2026.
Kompania “Finman” zotëron disa shoqëri të njohura, mes tyre “Albstar” shpk, “Manastiri Resort” shpk, “Arena Center” shpk dhe një sërë kompanish të tjera.
Sipas raportimeve në media, konflikti ka nisur gjatë mbledhjes së bordit, ku ortaku me shumicën e aksioneve, Idajet Ismailaj, së bashku me djalin e tij Florid Ismailaj dhe truprojat e tyre, dyshohet se kanë goditur me grushte dhe sende të forta Sokol Agalliun, djalin e ortakes tjetër të shoqërisë.
Po sipas të njëjtave raportime, ndaj tij janë bërë edhe kërcënime me jetë.
Skyweb.al ka konsultuar dokumentacionin e kompanisë dhe rezulton se përplasja nuk është vetëm një sherr mes ortakësh, por edhe një konflikt brenda familjes Ismailaj.
Sokol Agalliu përfaqëson në kompani interesat e nënës së tij, Rajmonda Agalliu.
Kjo e fundit është vajza e biznesmenit Sadik Ismailaj. Sadik Ismailaj është babai i Idajet Ismailajt dhe Rajmonda Agalliut.
Pra, konflikti ka përballur dajën me nipin, pasi Idajet Ismailaj dyshohet se ka shkuar në mbledhje me truproja dhe ka dhunuar Sokol Agalliun.
Në qendër të përplasjes, sipas raportimeve mediatike, është edhe projekti shumë i diskutuar i “Manastiri Resort” në Gjirin e Manastirit, i njohur publikisht edhe si “pika e voçkël” e Mirela Kumbaros.
Raportohet se përplasja mes ortakëve ka nisur pasi Sokol Agalliu ka akuzuar Idajet Ismailajn dhe djalin e tij për zhdukjen e 500 milionë lekëve nga arka e kompanisë.
Po ashtu, Agalliu mësohet se pretendon se ka zbuluar se Idajet Ismailaj dhe Florid Ismailaj kanë përvetësuar edhe 750 metra katrorë te “Manastiri Resort”.
Projekti “Manastiri Resort” ka qenë prej vitesh objekt debatesh publike. Një nga vendimet më të diskutuara ka qenë leja e dhënë nga ish ministrja Mirela Kumbaro për ndërtimin e resortit nga kompania “AlbStar” e Idajet Ismailajt, brenda zonës së mbrojtur të Parkut të Butrintit.
Në vitin 2021, Kumbaro firmosi vendimin që Gjiri i Manastirit, në hyrje të zonës së Ksamilit, të hiqej nga zona e mbrojtur.
Më pas, Këshilli Kombëtar i Territorit dha lejen për ndërtimin e resortit.
Projekti u kundërshtua fort në atë kohë. Vetë Kumbaro, gjatë një interpelance në Kuvend, e cilësoi projektin si “një pikë e voçkël”. Por dokumentet e mëvonshme të KKTU tregojnë se kjo “pikë” është zgjeruar disa herë.
Sipas dokumenteve të miratuara në vitin 2024, në harta duket qartë se projekti është shumëfishuar, duke e kthyer atë që u paraqit si një ndërhyrje e vogël në një resort të madh dhe shumë të diskutuar, mbi një territor me ndjeshmëri të lartë publike dhe mjedisore.
Përplasja e fundit mes ortakëve të “Finman” e rikthen edhe një herë në vëmendje këtë projekt, këtë herë jo vetëm për debatet mbi lejet dhe zonën e mbrojtur, por edhe për konfliktin e ashpër financiar dhe familjar që duket se ka shpërthyer brenda grupit që kontrollon kompanitë e përfshira në investim. /skyweb.al
