Rreth 11 mijë fermerë kanë aplikuar në katër ditët e para për Skemën Kombëtare të Mbështetjes në Bujqësi 2026, duke treguar interes të lartë për fondet e këtij viti.
Shifra u bë e ditur nga drejtuesja politike e qarkut Fier, Belinda Balluku dhe ministri i Bujqësisë dhe Zhvillimit Rural, Andis Salla, gjatë një vizite në AgroPikën e Lushnjës, ku fermerët po asistohen për plotësimin e aplikimeve.
Sipas Ministrisë së Bujqësisë, vetëm në katër ditët e para janë regjistruar mbi 10,500 aplikime në të gjithë vendin.
“Fermerët kanë qenë të përgatitur, sepse skema është ndërtuar pas konsultimeve të drejtpërdrejta me ta. Kjo reflektohet edhe në interesin e lartë që po shohim në ditët e para të aplikimeve”, u shpreh Salla.
Skema Kombëtare 2026 ka një buxhet fillestar prej 5.2 miliardë lekësh dhe aplikimet do të qëndrojnë të hapura deri më 26 qershor.
Një nga ndryshimet kryesore këtë vit është ulja e pragut për përfitimin në blegtori. Për të imtat, pragu është ulur nga 100 në 50 krerë, duke zgjeruar numrin e fermerëve që mund të përfitojnë mbështetje.
Skema parashikon gjithashtu rritje të mbështetjes financiare për blegtorët, si edhe financim për ndërtimin dhe rikonstruksionin e staneve.
Mbështetja për stane përfshin investime në infrastrukturë, energji diellore, depozitim uji dhe pajisje të nevojshme për garantimin e standardeve të sigurisë ushqimore.
Një pjesë tjetër e skemës lidhet me Shoqëritë e Bashkëpunimit Bujqësor, si edhe me mundësinë që fermerët të bashkojnë sipërfaqet për të përfituar nga masat mbështetëse për tokën bujqësore.
Aplikimet mund të kryhen në tri mënyra: në AgroPika, përmes platformës e-Albania dhe pranë njësive të qeverisjes vendore.
Ministria e Bujqësisë thotë se kjo mënyrë është zgjedhur për t’u dhënë fermerëve akses më të lehtë dhe asistencë më të drejtpërdrejtë gjatë aplikimit.
