Në një lagje të Oslos, në Norvegji, një ide e pazakontë ka kthyer një pallat banimi në një nga vendet më të veçanta për të ngrënë pica. Çdo të mërkurë, poshtë një apartamenti në Sigurd’s gate 7, vetëm pak minuta larg stacionit qendror të Oslos, njerëzit presin në radhë me sytë nga ballkoni, prej nga picat zbresin me një kosh të lidhur në litar.
Ideja është e Peter Gran, një inxhinier 30-vjeçar dhe konsulent i inteligjencës artificiale, i apasionuar pas kuzhinës italiane. Ai vendosi ta kthente apartamentin e tij në një piceri të improvizuar dhe ballkonin në pikën e dorëzimit të porosive. 
Projekti mban emrin “Pizza From A Balcony” dhe funksionon në mënyrë të thjeshtë. Klientët presin poshtë pallatit, japin emrin dhe porosinë, paguajnë përmes një aplikacioni norvegjez dhe më pas presin që pica të jetë gati. Kur porosia përfundon, emri i klientit thirret nga ballkoni dhe pica zbret nga kati i tretë në një kosh me litar.
Menuja është e kufizuar, por kjo nuk i ka penguar dhjetëra njerëz të presin çdo javë për të provuar picat e përgatitura në apartament. Në menu ka margherita, pica me salcë të kuqe dhe ‘nduja pikante, si edhe pica të bardha me salsiçe dhe friarielli. Çmimi i një pice varion rreth 13 deri në 15 euro, ndërsa lëngu i mollës shitet për rreth 8 euro.
“Piceria” qëndron e hapur derisa të mbarojnë përbërësit, ndaj klientët këshillohen të shkojnë herët. Në një nga ditët më të suksesshme, Gran ka arritur të shesë 95 pica brenda vetëm dy orësh.
Ajo që e ka bërë të veçantë këtë nismë nuk është vetëm mënyra e dorëzimit të picave, por atmosfera që krijohet poshtë pallatit. Njerëzit presin në rrugë, flasin me njëri-tjetrin, dëgjojnë muzikë live dhe shpesh e hanë picën aty, duke e kthyer pritjen në një aktivitet social. Në disa raste, pranë hyrjes së pallatit ka edhe muzikantë që luajnë jazz, ndërsa radhët vazhdojnë edhe në ditë me shi.
Ideja e Gran nisi pasi ai mori si dhuratë një furrë me gaz për pica. Më pas, bashkë me familjen, mendoi një mënyrë origjinale për t’i shpërndarë picat: me kosh dhe litar, si dikur. Fillimisht ftoi miq dhe të njohur përmes rrjeteve sociale, por lajmi u përhap shpejt dhe projekti u bë viral.
Sipas Gran, fitimet nga “Pizza From A Balcony” mbulojnë kryesisht kostot e përbërësve. Qëllimi i tij nuk është fitimi, por kontakti me njerëzit dhe krijimi i një ndjesie komuniteti.
Në një kohë kur porositë ushqimore janë bërë gjithnjë e më të automatizuara dhe të ftohta përmes aplikacioneve, ideja e një pice që zbret nga ballkoni me litar ka rikthyer diçka të thjeshtë: pritjen, bisedën dhe kontaktin mes njerëzve.
