Një deklaratë e fundit e kryeministrit të Maqedonisë së Veriut, Hristijan Mickoski, ka ndezur një debat të gjerë publik në vend, pasi ai propozoi një masë të pazakontë për të frenuar rënien demografike: vendosjen e një takse shtesë për qytetarët që janë ende beqarë.
Në një prononcim për median, Mickoski tha se “po shqyrtohen të gjitha opsionet” për të ndalur shpopullimin, përfshirë edhe penalizimin fiskal të beqarëve, si mënyrë për të nxitur krijimin e familjeve dhe rritjen e lindshmërisë. Sipas të dhënave zyrtare, në vitin 2024 është shënuar një rënie e ndjeshme e normës së lindjeve, ndërkohë që vendi ka humbur mbi 33 mijë banorë në katër vitet e fundit si pasojë e rënies natyrore të popullsisë.
Kryeministri e përshkroi këtë ide si pjesë të një “lufte shtetformuese” për të forcuar familjen dhe për të ndalur hemorragjinë demografike që po prek Maqedoninë e Veriut dhe shumë vende të rajonit.
Megjithatë, propozimi ka ngjallur reagime të forta nga qytetarë, aktivistë dhe ekspertë të të drejtave të njeriut, të cilët e kanë cilësuar si një nismë diskriminuese që cenon të drejtën për jetën private dhe zgjedhjen individuale. Kritikët paralajmërojnë se një masë e tillë do të dëmtonte më shumë shtresat vulnerabël dhe nuk do të kishte efekt real në rritjen e lindshmërisë.
Nga ana tjetër, përkrahësit e idesë thonë se Maqedonia e Veriut po përballet me një emergjencë kombëtare dhe se është e nevojshme një politikë e fortë shtetërore për të kthyer trendin negativ të popullsisë.
Qeveria pritet të publikojë në ditët në vijim detaje më të hollësishme për masat që do të ndërmerren, ndërsa çështja e “taksës për beqarët” mbetet në qendër të vëmendjes mediatike dhe polemikave politike në Shkup. /skyweb.al
