Përplasja mes ortakëve në projektin e Aeroportit të Vlorës është thelluar edhe më tej, pasi pronari i 2A Group, Valon Ademi, ka dalë me një reagim publik me akuza të drejtpërdrejta ndaj Behgjet Pacollit.
Në deklaratën e tij, Ademi pretendon se Pacolli i ka ofruar 80 milionë euro në shkurt të vitit 2025 për blerjen e aksioneve të aeroportit, duke pretenduar se kjo bëhej për llogari të rusëve.
Sipas Ademit, ai e ka refuzuar ofertën, ndërsa thotë se pikërisht ky refuzim është zanafilla e konfliktit që po vazhdon edhe sot në raport me projektin e Aeroportit të Vlorës.
Pronari i 2A Group shkruan se me Pacollin nuk ka “asnjë problem personal”, por e konsideron atë si pjesë të një skeme që sipas tij synon marrjen nën kontroll të aeroportit. Ai përmend edhe emrin e Bart Turtelboom, për të cilin thotë se është pjesë e kësaj skeme financiare dhe juridike.
Në reagimin e tij, Ademi pretendon se pasi refuzoi ofertën prej 80 milionë eurosh, Pacolli i ka thënë se “pronar formal do të vazhdojë të figurojë Mabco”. Sipas tij, ky ishte momenti që solli përplasjen që sot është bërë publike.
Ademi shprehet se deri tani ka zgjedhur të mos i bëjë publike shumë detaje, duke pritur reagimin e institucioneve kompetente, por shton se nuk do të tërhiqet nga beteja e tij.
Ai përdor gjithashtu tone të ashpra ndaj Pacollit, duke e akuzuar se po vepron për interesa që bien ndesh me interesin publik dhe se po përpiqet të ndikojë opinionin publik përmes propagandës.
Në fund të reagimit, Ademi deklaron se nuk do të pranojë në asnjë rast shitjen e Aeroportit të Vlorës dhe se, sipas tij, ky aset nuk do të blihet “kurrë” nga ata që ai pretendon se qëndrojnë pas kësaj skeme.
Deklarata e Valon Ademit vjen në një moment kur tensionet mes palëve për projektin e Aeroportit të Vlorës janë bërë publike dhe kur konflikti mes ortakëve ka ngritur pikëpyetje të forta për të ardhmen e këtij investimi strategjik.
Reagimi i Valon Ademit
Emisar,
Unë e njoh shumë mirë strategjinë tënde, pasi e kuptoj qartë që “ujku do mjegull”. Për këtë taktikë, ti je i shkolluar dhe i trajnuar prej kohësh nga shefat e tu, ndaj dhe strategjinë e mjegullës di ta zbatosh me mjeshtëri. Megjithatë, nëse kjo qasje mund të funksionojë për të hutuar opinionin publik, me mua të ka dështuar.
Siç ta kam bërë të qartë: me ty, emisar, unë nuk kam asnjë problem sepse ti nuk je as aktor dhe as faktor në këtë mes; je thjesht një agjent i përdorur për të marrë nën kontroll Aeroportin e Vlorës. Lufta ime është me kolegun tënd, Bart Turtelboom, i cili është ekzekutori i skemës financiare dhe juridike për t’ua dorëzuar këtë aset kombëtar shefave tuaj, atje ku i keni.
Ti detyrën tënde po e zbaton me përpikëri, sipas udhëzimeve. Ndaj, ti nuk ke faj që unë e refuzova ofertën tënde prej 80 milionë eurosh në shkurt të vitit 2025, për t’ia shitur aeroportin atyre që ti i di mirë. Madje, kur unë e refuzova atë ofertë pikërisht për shkak të asaj që ata përfaqësojnë, ti më the tekstualisht: “Mos u shqetëso, sepse pronar formal do të vazhdoj të figuroj Mabco.”
Refuzimi im i prerë atë natë është zanafilla e kësaj situate të cilën po e përballoj edhe sot. “Gabimi” im i vetëm ishte refuzimi për ta shitur Aeroportin e Vlorës atje ku ti kishe marrë urdhër ta dorëzoje.
Deri më sot, shumë detaje i kam mbajtur larg vëmendjes publike, duke pritur që organet kompetente të bëjnë detyrën e tyre, në mos atë ligjore, të paktën atë patriotike. E kam bërë betejën time në heshtje, në respekt të institucioneve. Por, edhe pse ata që duhej të reagonin heshtën, unë nuk do të ndalem, kurrë.
Emisar, tregoj shefave të tu, se unë nuk shitem, nuk intimidohem, nuk frikësohem dhe nuk dorëzohem kurrë përballë tyre! Tregoju se paraja e tyre, për mua s’ka asnjë vlerë. Ata mund të blejnë gazetarë, media e portale, por Aeroportin e Vlorës nuk do ta blejnë kurrë.
As ti dhe as propaganda jote me mercenarë e zagarë nuk më intimidon, sepse, në të gjithë këtë proces të Aeroportit të Vlorës, i vetmi njeri i shitur, i blerë dhe i komprometuar je ti.
Dil e tregoju shqiptarëve se kush fshihet pas “Compartment Bernina”. Dil e tregoju me sa rubla u pagove. Dil e tregoju se te gjitha veprimet po i bën vetëm për interes të Compartment Bernina-s, interesa këto që bien ndesh me interesin publik, atëherë mund të marrësh guximin të përmendësh emrin tim.
Ti emisar, edhe mashtrimet i bën për të mbuluar atë se çfarë në të vërtetë je, sepse ti nuk je emisar për një mision, por ti je agjent me mision të përjetshëm, sepse ti shpirtin edhe dinjitetin e ke shitur me kohë, e tash vepron me urdhra nga atje ku je shitur!
Turp të qoftë emri Behgjet e mbiemri Pacolli! /skyweb.al
