Pas shtatë ditësh protesta kundër projektit të planifikuar në Zvërnec, qeveria ka zgjedhur të ulë tonet dhe të flasë për reflektim.
Ministri i Turizmit, Kulturës dhe Sportit, Blendi Gonxhja, ka reaguar për kundërshtimet e qytetarëve, aktivistëve dhe të rinjve që prej ditësh protestojnë në bulevardin “Dëshmorët e Kombit” në Tiranë, duke kërkuar rishikimin e projektit në zonën e mbrojtur të Zvërnecit.
Në një prononcim për mediat nga Pogradeci, Gonxhja tha se situata kërkon vëmendje, analizë dhe reflektim të thellë nga të gjitha palët. Deklarata e tij vjen në një moment kur protesta ka hyrë në ditën e shtatë dhe kur presioni publik ndaj qeverisë është rritur ndjeshëm.
“Ne jetojmë në Tiranë dhe e kemi shumë të qartë që është një situatë e cila kërkon vëmendje, analizë dhe reflektim të thellë. Duam të kemi një qasje sa më të mirëmenduar dhe të ekuilibruar në raport me kërkesat e tyre”, deklaroi ministri.
Gonxhja tha se qeveria po ndjek me vëmendje zhvillimet dhe nuk është nxituar të japë reagime të menjëhershme, me qëllim që të ketë një qëndrim të peshuar ndaj shqetësimeve të ngritura.
Sipas tij, kauza kryesore e protestës lidhet me çështje mjedisore, ndërsa shtoi se si ministër ka përgjegjësi për aspektet që lidhen me zhvillimin turistik. Gonxhja tha se po kryhen analiza dhe verifikime për rëndësinë e projekteve turistike në Zvërnec, si edhe për modele të ngjashme zhvillimi në Shqipëri dhe në rajon.
Ministri u përpoq ta paraqesë protestën si një proces që duhet respektuar, duke e lidhur atë me lirinë e shprehjes dhe funksionimin e demokracisë.
“Ne e respektojmë protestën. Ajo vjen edhe sepse liria në vend është në një nivel shumë të lartë. Duhet ta ruajmë këtë forcë të demokracisë dhe të dëgjojmë pjesën serioze dhe thelbësore të shqetësimeve që ngrihen”, tha Gonxhja.
Ai vlerësoi gjithashtu faktin që debati publik është përqendruar te mbrojtja e mjedisit, biodiversitetit dhe specieve të mbrojtura, duke e konsideruar këtë si shenjë të një ndjeshmërie më të lartë shoqërore.
“Fakti që sot diskutojmë për flamingot, speciet e mbrojtura dhe ndjeshmërinë mjedisore tregon se shoqëria ka bërë përparim. Për çështjet që janë thelbësore dhe me interes publik, ne po marrim masat për të qenë të përgatitur dhe për t’iu përgjigjur çdo problematike të ngritur”, u shpreh ai.
Deklaratat e Gonxhjes shënojnë një ndryshim toni nga ana e qeverisë, e cila deri më tani është përballur me një protestë të përditshme kundër projektit në Zvërnec. Ndryshe nga qëndrimet më të ashpra politike, ministri foli për dëgjim, analizë dhe reflektim, në një përpjekje për të zbutur tensionin dhe për t’i dhënë përgjigje shqetësimeve të ngritura.
Protestat kundër projektit në Zvërnec kanë mbledhur çdo ditë qytetarë, aktivistë të mjedisit dhe të rinj, të cilët kërkojnë mbrojtjen e zonës së Nartës dhe lagunës së saj. Organizatorët kanë paralajmëruar se mobilizimi do të vijojë deri në rishikimin e projektit dhe dhënien e garancive për mbrojtjen e zonës së mbrojtur.
