Gjashtë mbikalime të reja për këmbësorët do të ndërtohen në kilometrat e parë të autostradës Tiranë Durrës, si pjesë e ndërhyrjeve plotësuese që pasojnë zgjerimin e këtij aksi të rëndësishëm rrugor.
Autoriteti Rrugor Shqiptar ka nisur procedurat për realizimin e projektit, i cili synon të përmirësojë aksesin dhe sigurinë e banorëve që jetojnë në zonat përgjatë autostradës. Mbikalimet do të shërbejnë si pika të dedikuara kalimi, duke shmangur lëvizjen e rrezikshme të këmbësorëve në një nga rrugët me fluksin më të lartë në vend.
Tenderi pritet të mbyllet më 15 qershor. Pas shpalljes së fituesit, punimet parashikohet të nisin menjëherë në terren. Përveç ndërtimit të gjashtë mbikalimeve, projekti përfshin edhe vendosjen e ndriçimit, gjelbërimin e zonave përkatëse, instalimin e barrierave akustike dhe ndërhyrje të tjera plotësuese.
Sipas projektit të ARRSH-së, mbikalimi i parë do të vendoset pas objektit të VEKO Group, ndërsa i dyti rreth 50 metra pas Universitetit Polis, duke krijuar akses më të sigurt për banorët e zonës së Yrshekut.
Mbikalimi i tretë do të ndërtohet pak metra pas QTU-së, i katërti në afërsi të BRUNES, i pesti rreth 100 metra përpara objektit të FedEx Albania, ndërsa i gjashti pranë Autostar.
Ministri i Infrastrukturës dhe Energjisë, Enea Karakaçi, gjatë një inspektimi të punimeve për zgjerimin e autostradës Tiranë Durrës, deklaroi se garantimi i aksesit për banorët është një nga elementët kryesorë të projektit.
Sipas tij, ndërhyrjet pritet të nisin së shpejti dhe synimi është që ato të përfundojnë brenda muajit shtator, në mënyrë që mbikalimet të jenë të aksesueshme për qytetarët me nisjen e vitit të ri shkollor.
