Një dosje hetimore e Prokurorisë së Tiranës ka zbuluar dyshime për shkelje të rënda në ndërtimin e një pallati shumëkatësh pranë QSUT-së, ku autoritetet dyshojnë për tejkalim të lejes së ndërtimit, shitje informale të apartamenteve dhe fshehje të ardhurash.
Sipas materialeve hetimore, procedimi penal është regjistruar për veprat penale “Ndërtimi i paligjshëm”, “Fshehja e të ardhurave” dhe “Shpërdorimi i detyrës”, pas referimeve të ardhura nga Policia e Shtetit dhe Agjencia e Mbikëqyrjes Policore.
Në qendër të hetimit ndodhet një objekt në ndërtim në rrugën “Llukë Kaçaj”, i zhvilluar fillimisht nga shoqëria “Mirson 2A” sh.p.k., për të cilin dyshohet se ka pësuar ndryshime të paautorizuara nga projekti i miratuar. Sipas dosjes, hetuesit kanë evidentuar shtesa në kate dhe ndërhyrje që nuk përputhen me lejen e dhënë nga institucionet përkatëse.
Po ashtu, hetimet kanë ngritur dyshime se një pjesë e apartamenteve janë shitur përmes kontratave porosi, ndërsa pagesat janë kryer pjesërisht jashtë sistemit bankar, çka ka sjellë dyshime për mosdeklarim të plotë të të ardhurave.
Prokuroria ka administruar kontrata, dëshmi dhe dokumentacion nga Bashkia e Tiranës dhe Inspektorati i Mbrojtjes së Territorit. Sipas të dhënave të mbledhura, ndaj objektit janë marrë më herët edhe masa administrative për shkelje gjatë punimeve, por ndërtimi ka vijuar.
Dosja hedh dyshime edhe mbi mosveprimin e strukturave përgjegjëse për kontrollin e territorit, të cilat sipas hetuesve nuk kanë reaguar në kohë pavarësisht konstatimeve të kryera në terren.
Gjatë kontrolleve të ushtruara nga Policia e Shtetit në kuadër të hetimit, nuk janë gjetur në adresat e deklaruara Ferdinand Shtembari dhe Mirsim Jella.
Për këtë arsye, ata janë shpallur në kërkim policor me qëllim lokalizimin dhe marrjen në pyetje.
Burime nga hetimi sqarojnë se shpallja në kërkim nuk përbën masë arresti apo ndalimi, por një procedurë për sigurimin e pranisë së personave të përfshirë në hetim dhe sqarimin e rrethanave të çështjes.
Hetimet vijojnë për të përcaktuar përgjegjësitë penale dhe administrative të të gjithë personave dhe subjekteve të përfshira.
