SPAK ka goditur një grup të dyshuar kriminal të trafikut ndërkombëtar të drogës, i lidhur me Dritan Gjikën dhe Eldi Dizdarin, që sipas hetimeve ka trafikuar të paktën 50 ton kokainë nga Amerika Latine drejt vendeve të Bashkimit Europian.
Me vendim të GJKKO-së, ndaj 10 personave është caktuar masa e sigurisë “arrest në burg”. Deri tani është ekzekutuar vetëm masa ndaj Florjan Musajt. SPAK bën me dije se dy persona dyshohet se ndodhen në Shqipëri, ndërsa shtatë të tjerët jashtë territorit shqiptar.
Personat për të cilët është caktuar masa janë: Nikoll Bibaj, Isa Aliu, Sokol Bibaj, Florjan Musaj, Armando Pacani, Denis Matoshi, Naldi Yzeiraj, Oklid Aliu, Dritan Gjika dhe Shpëtim Aliu.
Dosja është hetuar nga prokurorët Klodjan Braho dhe Doloreza Musabelliu. Sipas SPAK, grupi ka operuar gjatë viteve 2019-2021 në Amerikën Latine, Brazil, Belgjikë dhe Holandë. Hetimet kanë dokumentuar pesë episode të trafikimit të drogës, ku janë sekuestruar rreth 9 ton kokainë.
Paralelisht me trafikun, SPAK ka zbardhur edhe skemën e dyshuar të pastrimit të parave. Sipas hetuesve, fitimet nga aktiviteti kriminal silleshin në Shqipëri kryesisht në formë cash, duke shmangur sistemin bankar, dhe më pas investoheshin në pasuri të paluajtshme, kompani ndërtimi, hoteleri, konsulencë dhe aktivitete të tjera biznesi.
Një rol të rëndësishëm në këtë skemë dyshohet se ka pasur Isa Aliu. Sipas dosjes, pas futjes së shumave të mëdha në kompaninë “A.R.H” sh.p.k., aktiviteti i saj u orientua drejt ndërtimit. Kompania dyshohet se u përdor fillimisht si nënkontraktore në projekte banimi, me qëllim krijimin e një fasade të ligjshme për qarkullimin e fondeve.
Hetimet kanë evidentuar edhe blerje të dyshuara fiktive kuotash në kompani me çmime shumë më të ulëta se vlera reale. Përmes kësaj skeme, sipas SPAK, sigurohej kontrolli mbi subjekte tregtare me kosto minimale, ndërsa paratë qarkullonin përmes huave mes personave fizikë dhe kompanive të lidhura. Kjo krijonte një histori ekonomike artificiale dhe vështirësonte gjurmimin e origjinës së parave.
Në kuadër të operacionit janë sekuestruar 491 pasuri dhe asete me vlerë të përllogaritur rreth 150 milionë euro. Bëhet fjalë për kompani, vila luksoze, llogari bankare dhe të drejta pasurore në projekte ndërtimi e turizmi.
Mes subjekteve të vendosura në sekuestro janë “Aliu Road House” sh.p.k., “Green Invest” sh.p.k., “Seaview Development” sh.p.k. dhe “A.R.H Security” sh.p.k.
Në sekuestro është vendosur edhe një pjesë e kompleksit multifunksional turistik, rezidencial dhe komercial “Porto Lalzi/Lalzi Marina Seaside” në Hamallaj, Gjiri i Lalzit, sipas marrëveshjes mes shoqërisë “Sviluppo Mare 1” dhe “Aliu Road House”.
SPAK ka vendosur nën sekuestro edhe të drejtat reale mbi pasuritë që përftohen nga “Seaview Development” dhe “Aliu Road House” për ndërtimin e hotelit “Zig-Zag” me 5 yje në Jalë, Himarë, me mbi 200 dhoma. Në këtë projekt, shoqëria “Narvalno Group” sh.p.k. kishte marrë përsipër bashkëfinancimin në masën 40% dhe nxjerrjen e lejes së ndërtimit nga AZHT.
Po ashtu, janë sekuestruar të drejtat pasurore mbi pasuritë e përftuara nga “Altea Construction” në projektin “Astoria Residence”, një kompleks rezidencial vilash në zonën e Mjull Bathores, Tiranë.
Në listën e pasurive dhe subjekteve të sekuestruara përfshihen gjithashtu “Altea Construction” sh.p.k., “F&XH Invest” sh.p.k., “Altea Invest” sh.p.k., pjesa takuese e Shpëtim Bibajt në shoqërinë “S.T.N.P.M”, “Hotel Elisa Tirana, Affiliated by Melia”, si dhe pasuritë e përftuara nga “Altea Invest” për ndërtimin e një strukture hoteliere në Dhërmi.
Sipas SPAK, qëllimi i skemës ishte futja e parave të trafikut të kokainës në ekonominë formale, kryesisht përmes ndërtimit, hotelerisë dhe pasurive të paluajtshme./skyweb.al
