Partitë politike mbeten institucionet më pak të besuara në Shqipëri. Sipas Anketimit Vjetor të Perceptimit 2026, të publikuar nga projekti WeBalkans, 77% e shqiptarëve deklarojnë se nuk kanë besim te partitë politike. Vetëm 21.9% e të anketuarve thonë se kanë besim tek ato.
Të dhënat tregojnë një hendek të thellë mes qytetarëve dhe klasës politike, në një kohë kur debati publik në vend dominohet nga korrupsioni, qeverisja, kostoja e jetesës dhe funksionimi i institucioneve.
Mosbesimi ndaj partive politike shoqërohet edhe me perceptimin e lartë për korrupsionin. Sipas të njëjtit anketim, korrupsioni renditet si problemi kryesor me të cilin përballet Shqipëria.
Plot 52.1% e qytetarëve e konsiderojnë korrupsionin shqetësimin më të madh kombëtar. Ai renditet përpara pagave dhe pensioneve të ulëta, që përmenden nga 44.5% e të anketuarve.
Në vendin e tretë renditet kostoja e jetesës dhe inflacioni, me 38.4%. Më pas vijnë problemet në shëndetësi, me 28.9%, varfëria me 26.9% dhe papunësia me 24.9%.
Emigracioni mbetet gjithashtu një shqetësim i rëndësishëm për shqiptarët, duke u përmendur nga 23.2% e të anketuarve.
Rezultatet sugjerojnë se pakënaqësia ndaj partive politike lidhet ngushtë me mënyrën se si qytetarët perceptojnë trajtimin e problemeve kryesore të vendit. Korrupsioni, pagat e ulëta, çmimet dhe shërbimet publike mbeten çështjet që rëndojnë më shumë në vlerësimin e opinionit publik.
Anketimi Vjetor i Perceptimit 2026 është realizuar nga projekti WeBalkans në Shqipëri, Bosnjë-Hercegovinë, Kosovë, Mal të Zi, Maqedoni të Veriut, Serbi dhe Turqi.
Në Shqipëri, sondazhi është bazuar në 1 mijë intervista me qytetarë në të gjithë vendin. Punimet në terren janë zhvilluar gjatë periudhës shkurt–prill 2026, përmes intervistave ballë për ballë me kampione përfaqësuese të popullsisë.
