Protesta kundër qeverisë së kryeministrit Edi Rama ka hyrë sot në ditën e saj të 23-të radhazi. Gjatë tubimit të sotëm, në emër të grupit koordinues të protestës, Dritan Goxhaj prezantoi kërkesat zyrtare që, sipas organizatorëve, janë hartuar pas propozimeve të qytetarëve gjatë më shumë se tri javëve të protestave.
Sipas tyre, këto janë 5 kërkesat kryesore:
1. Dorëheqja e kryeministrit Edi Rama dhe e të gjithë kabinetit qeveritar.
2. Krijimi i një qeverie teknike tranzitore, jopartiake, me mandat të qartë 12-mujor.
3. Hartimi i një Kushtetute të re, e cila do të miratohet me referendum popullor dhe do të përfshijë:
- Ndryshimin e Kodit Zgjedhor;
- Ndryshimin e ligjit për financimin e partive politike dhe organizatave;
- Kufizimin e mandatit të Kryeministrit në jo më shumë se dy mandate (të plota ose të pjesshme) gjatë gjithë jetës politike të një individi.
4. Mosheqja dorë nga kërkesat ekonomike dhe mjedisore, që përfshijnë:
- Anulimin e ndryshimeve në ligjin për “Zonat e Mbrojtura”;
- Anulimin e ndryshimeve në ligjin për “Trashëgiminë Kulturore”;
- Shfuqizimin e “Paketës së Maleve”;
- Shfuqizimin e statusit dhe kuadrit ligjor për “Investimet Strategjike”.
5. Hartimi i një kontrate të re sociale mes qytetarëve dhe shtetit, përmes konsultimeve me intelektualë, ekspertë teknikë dhe qytetarë apartiakë të propozuar nga vetë protestuesit.
Organizatorët deklaruan se këto kërkesa janë të panegociueshme dhe përfaqësojnë objektivat e lëvizjes qytetare që po zhvillohet prej 23 ditësh.
