Institucionet financiare jo-bankare të pagesave dhe huadhënies po kërkojnë akses në të dhënat elektronike të qytetarëve në portalin e-Albania.
Në kërkesat drejtuar Ministrisë së Ekonomisë dhe Inovacionit, ato argumentojnë se aksesi do të ndihmonte në identifikimin elektronik të klientëve, verifikimin e të dhënave dhe vlerësimin më të shpejtë të kërkesave për kredi.
Sipas tyre, kjo do të bëhej vetëm me pëlqimin e qartë dhe të dokumentuar të klientit.
Institucionet financiare propozojnë që aksesi të mos realizohet përmes llogarisë personale të qytetarit në e-Albania, por përmes një ndërfaqeje teknike të dedikuar.
Në këtë mënyrë, ato kërkojnë të marrin vetëm të dhënat që i konsiderojnë të nevojshme për identifikim, hapje llogarie, vlerësim risku apo aplikim për kredi.
Të dhënat e kërkuara përfshijnë adresën, vendlindjen, dokumentin e identifikimit, statusin e punësimit, punëdhënësin, nivelin e të ardhurave dhe burimin e fondeve.
Sipas tyre, aksesi në këto të dhëna do të ulte rrezikun e mashtrimit dhe do të përmirësonte procesin e njohjes së klientit.
Institucionet jo-bankare e lidhin kërkesën edhe me standardet për parandalimin e pastrimit të parave dhe financimit të terrorizmit.
Ato argumentojnë se duhet të kenë akses të ngjashëm me subjektet e tjera të autorizuara, si noterët.
Kërkesa vjen në një kohë kur kompanitë e kredive të shpejta janë kritikuar shpesh për interesat e larta dhe kostot e rënda për konsumatorët.
Nëse miratohet, mekanizmi do t’u jepte këtyre institucioneve mundësi të verifikojnë më shpejt të dhënat e qytetarëve përmes sistemeve shtetërore.
Çështja pritet të hapë debat për balancën mes lehtësimit të shërbimeve financiare dixhitale dhe mbrojtjes së të dhënave personale të qytetarëve.
