Shqiptarët pritet të paguajnë të paktën 100 milionë euro më shumë në vit nga reforma e re e taksës së pronës.
Qeveria synon që të ardhurat nga taksimi i pasurive të paluajtshme të rriten nga 0.3% e Prodhimit të Brendshëm Bruto aktualisht, në 0.7 deri në 1% të PBB-së.
Për vitin 2025, bashkitë kanë arkëtuar 8.1 miliardë lekë nga taksa e pasurive të paluajtshme. Nëse reforma arrin objektivin minimal prej 0.7% të PBB-së, të ardhurat do të shkonin në rreth 17.6 miliardë lekë.
Sipas Monitor, kjo do të thotë 9.4 miliardë lekë më shumë në vit, ose afërsisht 100 milionë euro shtesë nga qytetarët dhe bizneset.
Në skenarin më të lartë, ku të ardhurat arrijnë në 1% të PBB-së, arkëtimet do të shkonin në 25.1 miliardë lekë.
Në këtë rast, barra shtesë do të ishte rreth 17 miliardë lekë, ose afërsisht 179 milionë euro më shumë në vit.
Reforma parashikon ndryshimin e formulës së taksimit dhe kalimin gradual drejt taksimit mbi bazën e vlerës së tregut.
Sistemi i ri do të nisë fillimisht për ndërtesat nga viti 2029, ndërsa nga viti 2031 do të shtrihet edhe te trualli dhe toka bujqësore.
Për banesën e parë parashikohet zbritje deri në 50% të vlerës së pronës si pjesë e patatueshme, por përfitimi do të varet nga vlera e banesës dhe pragjet e përcaktuara sipas bashkive.
