Janë publikuar të dhënat e deklarimit të pasurisë për vitin 2025 të kryeministrit Edi Rama dhe familjes së tij, ku pasqyrohen të ardhurat, lëvizjet në llogaritë bankare, kreditë dhe asetet financiare.
Sipas deklarimit, kryeministri Edi Rama ka raportuar 3.4 milionë lekë të ardhura nga paga në Kryeministri, ndërsa zëri më i lartë është ai i “të ardhurave të tjera”, me vlerë rreth 10.9 milionë lekë.
Në total, të ardhurat e deklaruara nga Rama për vitin 2025 arrijnë në mbi 14.3 milionë lekë.
Në dokumentin publik nuk specifikohet qartë burimi i këtyre të ardhurave të tjera, ndërsa llogaria bankare e kryeministrit rezulton të jetë shtuar me rreth 349 mijë lekë gjatë vitit.
Bashkëshortja e tij, Linda Rama, ka deklaruar rreth 6.7 milionë lekë të ardhura nga punësimi, ekspertiza dhe qiradhënia.
Në deklarim, ajo figuron edhe me një apartament me sipërfaqe 118 metra katrorë, i cili pas rivlerësimit ka vlerën rreth 19.2 milionë lekë.
Linda Rama ka deklaruar gjithashtu shlyerje kredish gjatë vitit, përfshirë rreth 338 mijë lekë për një kredi bankare në lekë dhe mbi 23 mijë euro për një tjetër detyrim në valutë.
Detyrimet e mbetura nga këto kredi janë ende të konsiderueshme, me rreth 4.7 milionë lekë dhe mbi 173 mijë euro.
Në deklarim përfshihet edhe djali i kryeministrit, Gregor Rama, i cili raporton ndryshime në kursimet dhe investimet e tij.
Sipas të dhënave, llogaritë e tij bankare janë shtuar me rreth 8.2 mijë euro dhe mbi 108 mijë lekë, ndërsa fondet e investimit janë pakësuar me rreth 16.4 mijë euro.
Ai deklaron gjithashtu mbi 1 milion lekë të ardhura të tjera dhe ulje të gjendjes cash me 2,500 euro.
Deklarimi pasqyron lëvizjet financiare të familjes Rama gjatë vitit 2025, ku pika që bie më shumë në sy mbetet zëri prej 10.9 milionë lekësh “të ardhura të tjera” të raportuara nga kryeministri, të cilat besohet se janë nga arti.
