Familjet shqiptare janë duke u rrënuar nga kostot e larta të produkteve bazë të jetesës. Të dhënat zyrtare nga Eurostat, Agjencia Europiane e Statistikave, tregojnë se Shqipëria është një nga vendet me çmimet më të larta të ushqimeve dhe pijeve jo alkolike në Europë duke lënë pas vende shumë më të pasura se ajo përfshirë Gjermaninë, Italinë, Spanjën dhe Hollandën.
Sipas Eurostat, niveli i çmimeve të ushqimeve në Shipëri vitin e kaluar ishte sa 103.8 për qind e mesatares së Bashkimit Europian, të matura sipas standardit të fuqisë blerëse. I njëjti tregues në Gjermani ishte 102.4 për qind, në Itali rezultoi 101.1 për qind, ndërsa në Hollande dhe Spanjë respektivisht 99.4 për qind dhe 95.3 për qind.
Kjo do të thotë se familjet shqiptare i paguajnë produktet bazë të jetesës shumë më shtrenjtë edhe se sa vendet më të pasura të Europës, ndërkohë që me ekonomitë e ngjashme diferenca e çmimeve për këtë kategori produktesh është edhe më e madhe.
Sipas Eurostat, në Maqedoninë e Veriut niveli i çmimeve të ushqimeve është sa 74.8 për qind e mesatares së BE-së. Në Bosnje ky tregues rezulton 85.8 për qind, ndërsa në Serbi 97.1 për qind.
Për shkak të varfërisë, familjet shqiptarë dedikojnë peshën më të madhe të buxheteve të tyre vetëm për të blerë ushqime. Aktualisht shqiptarët shpenzojnë 35.6 për qind të të ardhurave totale vetëm për ushqime, ndërkohë që në BE ky tregues është rreth 13 për qind.
Pesha e lartë e shpenzimeve për ushqime e kombinuar me nivelin e lartë të çmimeve është një miks varfërues për familjet shqiptare. Në gjithë këto vite shteti shqiptar nuk ka ndërmarrë asnjë politikë për të lehtësuar këtë kosto të rëndë mbi familjet, ndërkohë që arsyet e saj lidhen me kapjen e tregjeve dhe nivelin e lartë të taksave që qeveria aplikon mbi ushqimet bazë. /Kapitali.al
