Gjiri i Filikurit, një nga plazhet më të virgjëra dhe më të paprekura të bregdetit të Himarës, rrezikon të humbasë atë që e ka bërë të veçantë, izolimin natyror dhe mungesën e ndërhyrjeve masive.
Bashkia e Himarës, e drejtuar nga Vangjel Tavo, pikërisht në ditët kur fekalet kanë pushtuar ujërat e brigjeve të Himarës, ka hapur një tender me vlerë 20.8 milionë lekë pa TVSH për ndërtimin e shkallëve në këtë gji.
Por ky projekt ngre një pyetje të fortë: Kujt po ia bën gati Vangjel Tavo Gjirin e Filikurit?
Nëse qëllimi është thjesht lehtësimi i aksesit për qytetarët dhe turistët, pse bashkia nuk vendos për shembull shkallë në çdo gji të vështirë të bregut të Himarës, por zgjedh pikërisht Filikurin?
Ky plazh ka mbetur për vite larg turizmit masiv pikërisht sepse nuk është i lehtë për t’u arritur. Shkëmbinjtë, terreni i vështirë dhe mungesa e infrastrukturës kanë qenë mburoja natyrore që e kanë ruajtur nga mbipopullimi, ndotja dhe ndërhyrjet agresive duke mbetur një atraksion për të apasionuarit e këtij lloji turizmi.
Sipas dokumenteve të tenderit, nuk bëhet fjalë për disa shkallë të thjeshta apo për një rrugë të mirëfilltë. Projekti parashikon gërmime në shkëmb, mure mbajtëse, betonarme, kangjella metalike dhe ndriçim LED përgjatë aksit.
Pra, një nga zonat më të egra të bregdetit po pajiset me infrastrukturë betoni, duke e kthyer nga një plazh i izoluar në një destinacion masiv, me gjasë në shërbim në kastës së njerëzve pranë Vangjel Tavos.
Kjo sjell një tjetër shqetësim duke parë se si është sjellë Vangjel Tavo me pronat në Himarë: Kush garanton se pas hapjes së aksesit nuk do të pasojnë ndërtime, beach bar-e, struktura turistike apo projekte private pranë këtij gjiri?
Në bregdetin shqiptar, shumë ndërhyrje kanë nisur me arsyetimin e “aksesit publik”, por më pas janë pasuar nga rrethime, biznese sezonale, ndërtime dhe zaptim i hapësirave natyrore.
Pikërisht për këtë arsye, rasti i Filikurit kërkon transparencë të plotë nga Bashkia Himarë.
Bashkia duhet të sqarojë pse ky tender po bëhet pikërisht në Filikur, pse nuk po ndërhyhet me të njëjtën logjikë në gjire të tjera dhe çfarë garancish ka që projekti nuk do të shërbejë si hap i parë për zhvillime private në zonë.
Deri atëhere Vangjel Tavo është një i dyshuar publik se një tjetër llokmë nga plazhet e mrekullueshme të vendit po e bën pajë për njerëzit me të cilët ndan interesat dhe Filikuri duhet të ketë të njëjtën vëmendje si Zvërneci. /skyweb.al
