Ryanair ka ndryshuar politikën e saj për uljen e familjeve, pasi autoriteti britanik i konkurrencës hapi një hetim mbi tarifat që kompania u kërkonte prindërve për t’u ulur pranë fëmijëve të tyre.
Kompania më e madhe ajrore në Evropë njoftoi se, duke filluar nga e enjtja, të rriturve do t’u ofrohen pa pagesë vende pranë fëmijëve të tyre pasi të kenë kryer check-in për fluturimin, megjithëse këto vende zakonisht do të jenë në pjesën e pasme të avionit. Të gjithë fëmijët në të njëjtin rezervim do të vendosen pranë tyre pa pagesë.
Ryanair e cilësoi këtë si një “ndryshim të vogël të politikës”, vetëm dy javë pasi e kishte quajtur hetimin e Autoritetit të Konkurrencës dhe Tregjeve (CMA) “të pabazë”.
“Këto familje që zgjedhin ndarjen rastësore të vendeve pranë njëra-tjetrës ka shumë të ngjarë të vendosen në pjesën e pasme të kabinës, pasi rreshtat e përparmë zakonisht rezervohen dhe shiten të parët,” tha kompania. Ajo shtoi se familjet që dëshirojnë të zgjedhin vendet e tyre që në momentin e rezervimit dhe të sigurojnë vende në rreshtat e parë, mund ta bëjnë këtë duke paguar tarifën për rezervimin e vendit.
Deri tani, Ryanair u kërkonte prindërve që udhëtonin me fëmijë nga mosha 2 deri në 11 vjeç të paguanin për rezervimin e asaj që kompania e quante një vend familjar të detyrueshëm, ndërsa deri në katër fëmijë mund të uleshin pranë tyre pa pagesë shtesë.
Kjo bëri që CMA të hapte një hetim për të përcaktuar nëse politika e Ryanair ishte në përputhje me ligjin për mbrojtjen e konsumatorit. Hetimi zbuloi se tarifa për një vend familjar të detyrueshëm ishte zakonisht rreth 8 paund për çdo drejtim. CMA gjithashtu tha se besonte se Ryanair ishte e vetmja kompani e madhe ajrore që operon nga Mbretëria e Bashkuar që aplikonte një tarifë të tillë. Ryanair deklaroi se ky ndryshim nuk do të ndikojë në të ardhurat e saj.
Drejtori ekzekutiv i Ryanair, Michael O’Leary, akuzoi autoritetin rregullator se po “mbyll sytë” ndaj tarifave të larta që vendosin linjat ajrore në itineraret ku Ryanair nuk ka konkurrencë.
“CMA tani ka vënë në shënjestër politikën tonë të uljes së familjeve, e cila është përqafuar gjerësisht nga konsumatorët si më progresivja dhe më transparentja në Evropë.
Në vend që të promovojë konkurrencën dhe çmimet më të ulëta për konsumatorët, CMA është në një mision për ta detyruar Ryanair të adoptojë politikën më pak transparente dhe më pak miqësore ndaj konsumatorëve që përdoret nga shumica e kompanive të tjera ajrore, vetëm sepse ajo është standardi i industrisë.
Ne do ta pranojmë me hezitim këtë standard të industrisë, pasi nuk duam të humbasim kohë duke u shpjeguar rregullatorëve të keqinformuar se sa keq e kuptojnë ata se çfarë është në interesin më të mirë të konsumatorëve në Mbretërinë e Bashkuar dhe në Evropë.
Sipas politikës sonë të re për uljen e familjeve, familjet mund të duhet të presin deri pas check-in-it për të mësuar vendet e tyre dhe ka më shumë gjasa të ulen në pjesën e pasme të kabinës. Por të paktën CMA do të mund të pretendojë se ka bërë diçka për konsumatorët, edhe pse fatkeqësisht shumica e konsumatorëve nuk do ta vënë re ndryshimin”, ka deklaruar Michael O’Leary.
