Pasagjerët që nisen nga Aeroporti i Zyrihut nuk do të jenë më të detyruar t’i përmbahen kufirit prej 100 mililitrash për lëngjet në bagazhin e dorës.
Aeroporti ka njoftuar se, falë teknologjisë së re të kontrollit të sigurisë, udhëtarët tashmë mund të kalojnë në pikat e kontrollit me enë që përmbajnë deri në 2 litra lëngje.
Gjithashtu, nuk është më e nevojshme të nxirren nga çanta lëngjet apo pajisjet elektronike gjatë kontrollit.
Sipas njoftimit zyrtar të Aeroportit të Zyrihut, ndryshimi synon ta bëjë procesin e kontrollit të sigurisë më të shpejtë dhe më të thjeshtë për udhëtarët.
Megjithatë, aeroporti u kujton pasagjerëve të respektojnë kufirin maksimal të peshës së lejuar për bagazhin e dorës nga kompania ajrore me të cilën udhëtojnë.
Rregullat e reja zbatohen për pasagjerët që nisen nga Aeroporti i Zyrihut dhe përfitojnë nga skanerët e rinj të sigurisë të instaluar në terminal.
