Qeveria shqiptare ka firmosur një memorandum mirëkuptimi me kompaninë italiane ENI, me fokus sigurinë energjetike dhe krijimin e kapaciteteve për rezervimin e produkteve strategjike të naftës dhe gazit.
Marrëveshja u bë publike nga kryeministri Edi Rama gjatë podkastit “Flasim”, ku ai tha se bashkëpunimi me gjigantin italian të energjisë synon t’i japë Shqipërisë më shumë garanci në rast krizash furnizimi.
Sipas Ramës, zhvillimet e viteve të fundit në tregjet ndërkombëtare kanë treguar se vendet duhet të kenë kapacitete të qarta për magazinimin dhe menaxhimin e rezervave energjetike.
Në këtë kuadër, partneriteti me ENI-n parashikon krijimin e infrastrukturës për ruajtjen e naftës dhe gazit, si dhe ngritjen e një operatori të ri në tregun shqiptar të energjisë dhe hidrokarbureve.
Ky operator pritet të veprojë jo vetëm në tregun vendas, por edhe në atë rajonal, duke shfrytëzuar përvojën dhe ekspertizën teknike të kompanisë italiane.
“Ky partneritet nuk është thjesht një marrëveshje mes qeverisë dhe një kompanie ndërkombëtare, por është një investim afatgjatë”, deklaroi Rama.
Kreu i qeverisë theksoi se objektivi është rritja e sigurisë së furnizimit dhe krijimi i një modeli më të qëndrueshëm për administrimin e rezervave energjetike.
ENI është një nga kompanitë më të mëdha ndërkombëtare në sektorin e naftës, gazit dhe energjisë, me eksperiencë në shumë tregje globale.
Marrëveshja me kompaninë italiane synon të forcojë aftësinë e Shqipërisë për t’u përballur me ndërprerje të mundshme të furnizimit, luhatje çmimesh dhe kriza në tregjet ndërkombëtare të energjisë. /skyweb.al
