Kryeministri Edi Rama, ishte i pranishëm këtë të martë në Vlorë, ku dhe u nënshkrua Memorandumi i Bashkëpunimit mes kompanisë italiane FINCANTIERI, kompanisë shtetërore KAYO dhe Shkollës Industriale “Pavarësia”, për prodhimin e mjeteve detare në Pashaliman.
Rama deklaroi se qeveria do të miratojë një akt normativ për të rritur financimin e mbrojtjes, duke synuar 2.6% të buxhetit të shtetit, në përputhje me objektivat e NATO-s.
Sipas tij përfitues do të jenë strukturat e Ministrisë së Mbrojtjes dhe Forcat e Armatosura, si dhe të gjitha hallkat që i bashkohen këtij procesi rritjeje.
“Ne jemi sot në një ditë kur pas këtij takimi, qeveria shqiptare do të miratojë një akt normativ, ndër të tjera Shqipëria do të angazhojë të gjithë financimin e nevojshëm për të arritur targetin e përcaktuar nga anëtarësia jonë në NATO, që e çon në 2.6% të buxhetit të përgjithshëm të shtetit shpenzimin tonë për mbrojtje, ku përfituesit drejtpërdrejtë janë të gjithë ata që janë pjesë e strukturës sonë të Ministrisë së Mbrojtjes, FA, por edhe të gjithë ata që i bashkohen hap pas hapi kësaj rritjeje të jashtëzakonshme”, tha Rama.
Rama tha gjthashtu se nga partneriteti me kompaninë italiane do të krijohen 500 vende pune.
“Janë 500 vende pune që krijohen në këtë territor, nga ky partneritet dhe siç e tha administratori i përgjithshëm, janë 500 vende pune që kërkojnë njerëz të kualifikuar, ekspertizë, të mirëpaguara, në këtë sistem të ri që po ndërtohet. Duhet pasur parasysh që të gjithë ata që do përfshihen në këtë sipërmarrje, nuk do jenë thjesht njerëz që zotërojnë një zanat, por që do të shikohen edhe nga ana e figurës, sepse do të jenë pjesë e sistemit të mbrojtjes së Shqipërisë”, tha Rama. /skyweb.al
