Kryeministri Edi Rama u është përgjigjur kritikëve që pretendojnë se pagat në sektorin e turizmit në Shqipëri janë më të ulëta se në Greqi.
Përmes një postimi në rrjetet sociale, Rama publikoi një video nga Lungomarja e Radhimës, ku shfaqen tre të rinj që punojnë si kamarierë.
Sipas kryeministrit, ata paguhen me 1000 euro në muaj, ndërsa bakshishet i mbajnë vetë.
“Ndalova për të pirë një kafe këtu në Lungomaren 4 të Radhimës së Rilindur. Më erdhi një nga këta djemtë, më solli kafenë. E pyeta sa e ke pagën, më tha 1000 euro. Ou? Bakshishet i mbajnë vetë. Ja urdhëroni!”, shkruan Rama.
Kreu i qeverisë tha se kushdo që dyshon për këtë mund të shkojë dhe ta verifikojë vetë.
“Këtu jemi në Lungomare 4 në Radhimë. Kush do të vijë ta verifikojë të vijë, kush nuk do ta besojë le të vazhdojë të besojë atë që do”, shtoi ai.
Rama theksoi se, sipas tij, në sektorin e turizmit shqiptar pagat nuk janë më të ulëta se në Greqi.
Ai shtoi se në Shqipëri taksat janë shumë më të ulëta dhe se ajo që u mbetet punonjësve në fund është më e lartë.
“Por në Shqipëri, në turizëm nuk ka paga më të ulëta se në Greqi. Taksat janë shumë më të ulëta dhe ajo që mbetet në fund është shumë më tepër”, shkruan Rama.
Deklarata vjen në një kohë kur mungesa e fuqisë punëtore dhe largimi i punonjësve drejt vendeve fqinje vijojnë të jenë ndër shqetësimet kryesore të sektorit të turizmit.
