Qeveria ka përgatitur një projektligj të ri për kontabilitetin në sektorin publik, duke e ngritur për herë të parë këtë fushë në nivel ligji.
Deri më tani, kontabiliteti publik në Shqipëri është rregulluar kryesisht përmes udhëzimeve dhe akteve nënligjore, ndërsa drafti synon krijimin e një kuadri të unifikuar ligjor.
Projektligji përcakton rregulla për mbajtjen e kontabilitetit, përgatitjen, miratimin, dorëzimin dhe publikimin e pasqyrave financiare të institucioneve publike.
Njësitë publike do të kenë detyrim të mbajnë regjistra të plotë, të saktë dhe të përditësuar, si edhe të ruajnë dokumentacionin justifikues dhe kontabël për jo më pak se 10 vjet.
Drafti parashikon gjithashtu kalimin drejt standardeve ndërkombëtare të kontabilitetit për sektorin publik, me qëllim rritjen e transparencës dhe llogaridhënies në përdorimin e fondeve publike.
Një nga pikat më të rëndësishme lidhet me përgjegjësinë e zyrtarëve për shkeljet në raportimin financiar.
Sipas projektligjit, kur shkeljet nuk përbëjnë vepër penale, ato do të trajtohen si kundërvajtje administrative.
Për raste të tilla parashikohen masa administrative ose gjoba në masën nga 1 deri në 3 paga mujore.
Gjoba mund të vendosen për mosndjekjen e procedurave të inventarizimit, regjistrime kontabël pa dokumentacion justifikues, si edhe për mosdorëzimin apo mospublikimin e pasqyrave financiare.
Në rastet kur shkeljet lidhen me keqpërdorim fondesh publike, raportim të rremë financiar, fshehje detyrimesh apo dëmtim asetesh publike, çështja mund t’u referohet organeve kompetente për ndjekje penale.
Projektligji parashikon që zbatimi i plotë i reformës të bëhet në mënyrë të fazuar, brenda një periudhe tranzitore që nuk mund të zgjasë më shumë se tre vite nga hyrja në fuqi. /skyweb.al
