Komisioni i Prokurimit Publik ka kapur me shkelje Bashkinë Kamëz, të drejtuar nga Rakip Suli, për tenderin e ndërtimit të fushave sportive, parkingut dhe rrugëve në Valias. Procedura, me fond limit rreth 834 mijë euro me TVSH, është kundërshtuar nga tri kompani.
Vala e ankesave ka nxjerrë në pah mënyrën se si bashkia trajton kundërshtimet ndaj tenderëve të saj. Kompanitë pretendojnë se janë përdorur dy standarde në vlerësimin e ofertave, duke ngritur dyshime për favorizim në garë.
Siç konstaton Skyweb.al në vendimin e KPP-së, “gjykata e tenderëve” ka evidentuar një shkelje konkrete dhe i ka propozuar Agjencisë së Prokurimit Publik nisjen e hetimit administrativ.
Çfarë ndodhi?
Kompania “BE–IS” kundërshtoi kualifikimin e konkurrentëve, por ankesës i mungonte dokumenti i pagesës së tarifës. Bashkia e përdori këtë mangësi si shkak për të mos e shqyrtuar ankesën. Por rregullat kërkojnë që kompania të njoftohet dhe t’i jepen dy ditë për ta korrigjuar ankesën. Bashkia nuk e bëri këtë. Kur KPP i kërkoi shpjegime, ajo pranoi se kishte vendosur ta anashkalonte këtë hap.
“Autoriteti kontraktor nuk e ka vlerësuar të arsyeshme kërkimin për plotësimin e të metave të konstatuara”, thuhet në përgjigjen e Bashkisë Kamëz.
Pikërisht këtu KPP e kap bashkinë në shkelje, pasi një detyrim ligjor ishte trajtuar si zgjedhje e administratës. Komisioni konstaton se bashkia veproi “duke mos respektuar hapat proceduralë që parashikon kjo dispozitë ligjore, duke mos i kërkuar operatorit ekonomik ankimues, ndreqjen e të metave të ankesës”.
Pse janë ankuar kompanitë?
Një nga pretendimet kryesore është se bashkia ka zbatuar standarde të ndryshme. Bashkimi “LAÇAJ–MAKARESH” u skualifikua, ndër të tjera, sepse dy mjete të deklaruara ishin të angazhuara në një kontratë tjetër.
Ndërkohë, “K.TURJA” pretendon se “Shendelli” dhe “Britania” u kualifikuan megjithëse kishin kontrata të tjera aktive me të njëjtën bashki. Sipas ankuesit, kontrolli duhej të bëhej njësoj për të gjithë.
KPP nuk e vërtetoi këtë pretendim, pasi nuk u identifikuan konkretisht punonjësit apo mjetet që përdoreshin njëkohësisht. Tri ankesat nuk u pranuan dhe tenderi u lejua të vazhdojë; edhe “BE–IS” rezultonte ende pa paguar tarifën.
Tenderët e Bashkisë Kamëz kanë qenë objekt denoncimesh edhe më parë. Skyweb.al ka raportuar rastin e kontratës për Bllokun Paskuqan 2, ku ngriti shqetësimin për konflikt interesi në dhënien e tenderit kompanisë “SHPRESA–AL”.
Por në Valias, shkelja nuk mbetet vetëm te denoncimet e konkurrentëve. Bashkia pranon vetë hapin që anashkaloi, ndërsa KPP e cilëson shkelje dhe propozon hetim administrativ.
