Drejtoria e Përgjithshme e Policisë së Shtetit ka hapur një procedurë prokurimi me fond limit rreth 166.3 milionë lekë pa TVSH, ose afërsisht 1.76 milionë euro, për “blerje pajisje për përdorim policor”.
Sipas dokumenteve që ka konsultuar skyweb.al, tenderi zhvillohet si “procedurë e kufizuar mbi kufirin e lartë monetar”, në fushën e mbrojtjes dhe sigurisë, çka do të thotë se nuk është një prokurim i zakonshëm i hapur për çdo operator, por një procedurë me fazë parakualifikimi, ku fillimisht përzgjidhen kompanitë që plotësojnë kriteret dhe më pas ftohen të dorëzojnë ofertat.
Ajo që bie në sy është koha kur zhvillohet tenderi.
Procedura vjen në mes të një vale protestash në Tiranë, ku qytetarë, aktivistë dhe të rinj kanë dalë në shesh kundër projekteve të qeverisë dhe kanë artikuluar edhe thirrje politike për dorëheqjen e saj.
Për shkak të natyrës së prokurimit në fushën e mbrojtjes dhe sigurisë, në njoftimin publik nuk jepen detaje të plota mbi llojin konkret të pajisjeve që kërkohet të blihen. Objekti përmblidhet vetëm me formulimin “pajisje për përdorim policor”.
Megjithatë, urgjenca, vlera e lartë dhe koha e zhvillimit të procedurës ngrejnë pikëpyetje nëse blerja lidhet me nevojat e shtuara të Policisë në kushtet e protestave dhe me përgatitjen e strukturave të rendit për situata të mundshme tensioni. /skyweb.al
