Gjatë vitit 2025, 173 persona hoqën dorë nga shtetësia shqiptare, ndërsa 495 persona e fituan ose e rifituan atë, sipas të dhënave të publikuara nga INSTAT.
Nga personat që morën shtetësinë shqiptare, 306 e rifituan atë, ndërsa 189 e fituan për herë të parë. Sipas vendeve kryesore të origjinës, pjesën më të madhe e zënë shtetasit nga Kosova, me 56,1 për qind, të ndjekur nga Turqia me 20,1 për qind, Maqedonia e Veriut me 4,8 për qind dhe Italia me 4,8 për qind.
Por të dhënat sipas grupmoshave tregojnë një prirje më domethënëse: Pjesa më aktive e popullsisë është edhe ajo që më shpesh heq dorë nga shtetësia shqiptare.
Grupmosha 30-39 vjeç përbën peshën më të madhe si te fitimi, ashtu edhe te lënia e shtetësisë. Konkretisht, 31,7 për qind e personave që fituan shtetësinë shqiptare i përkisnin kësaj grupmoshe, ndërsa te ata që hoqën dorë nga shtetësia shqiptare pesha ishte edhe më e lartë, 43,9 për qind.
Kjo do të thotë se largimi nga shtetësia shqiptare është më i përqendruar te të rinjtë dhe të rriturit në moshë pune, pikërisht grupi që përbën pjesën më produktive të shoqërisë.
Ndërkohë, te moshat më të mëdha, sidomos pas të 50-ave, pesha e personave që fitojnë shtetësinë shqiptare rezulton më e lartë sesa ajo e personave që e lënë atë. Në këtë kuptim, statistikat tregojnë një tablo të qartë: Shqipëria humbet më shumë shtetas në moshat e reja dhe aktive, ndërsa fiton më shumë në grupmoshat më të larta.
