Qëndrimi ulur për më shumë se 30 minuta pa ndërprerje çdo ditë rrit rrezikun e vdekjes nga kanceri, sugjeron një studim i ri, shkruan The Guardian.
Studiuesit, të cilët ndoqën mbi 90 mijë persona për më shumë se një dekadë, zbuluan se qëndrimi ulur ose shtrirë gjatë kohës kur je zgjuar për më shumë se 30 minuta rresht çdo ditë lidhet me një rrezik më të lartë të vdekjes nga kanceri. Sipas gjetjeve, rreziku rritet me çdo orë shtesë të kaluar pa lëvizur.
Megjithatë, studiuesit zbuluan gjithashtu se ndërprerja e periudhave të gjata të qëndrimit ulur me intervale të shkurtra aktiviteti fizik mund ta ulë këtë rrezik. Sipas tyre, ngritja çdo 30 minuta, qoftë edhe për një shëtitje të shkurtër në zyrë, mund të sjellë përfitime të mëdha për shëndetin.
Dr. Frederick Ho, autori kryesor i studimit nga Universiteti i Glasgow, tha:
“Të dhënat tona tregojnë se qëndrimi ulur për më shumë se 30 minuta pa ndërprerje lidhet veçanërisht me një rrezik më të lartë të kancerit. Lajmi i mirë është se ndërprerja e kohës së kaluar ulur me diçka aq të thjeshtë sa një shëtitje e shkurtër mund të ketë efekt mbrojtës.”
Ai shtoi:
“Udhëzimet aktuale shëndetësore përqendrohen kryesisht te aktiviteti fizik me intensitet mesatar ose të lartë, por gjetjet tona tregojnë se edhe lëvizjet e lehta nuk duhen neglizhuar. Në të ardhmen, studimet klinike do të na ndihmojnë të zhvillojmë strategji më të personalizuara për ndërprerjen e periudhave të gjata të qëndrimit ulur.”
Studimi, i publikuar në revistën shkencore PLOS Medicine, analizoi efektet e qëndrimit të zgjatur ulur në shëndet. Edhe pse prej kohësh dihet se periudhat e gjata ulur ose shtrirë gjatë kohës kur je zgjuar lidhen me një rrezik më të lartë të sëmundjeve kardiovaskulare dhe disa llojeve të kancerit, studiuesit thonë se dihej më pak për ndikimin që ka mënyra se si grumbullohet kjo kohë pasive gjatë ditës.
Rezultatet treguan se zëvendësimi i kohës së kaluar ulur me aktivitet fizik mund të ulë rrezikun për disa lloje kanceri. Edhe aktivitete të lehta si ecja e ngadaltë ose punët e shtëpisë rezultuan të dobishme.
Ekipi analizoi të dhënat e pajisjeve që maten aktivitetin fizik, të mbajtura nga më shumë se 91 mijë pjesëmarrës të projektit UK Biobank, të cilët u ndoqën për një mesatare prej 12 vitesh.
Gjetjet tregojnë se periudhat e pandërprera të pasivitetit që zgjasin më shumë se 30 minuta lidhen me një rrezik më të lartë të vdekjes nga kanceri. Çdo orë shtesë e kaluar pa lëvizur çdo ditë shoqërohej me një rritje prej 10% të këtij rreziku.
Nga ana tjetër, zëvendësimi i periudhave të gjata të qëndrimit ulur me lëvizje duket se e ul këtë rrezik.
- Zëvendësimi i një ore në ditë të kaluar ulur me aktivitet fizik të lehtë, si hekurosja ose larja e enëve, u shoqërua me një ulje prej 12% të rrezikut të vdekjes nga kanceri.
- Zëvendësimi i 30 minutave qëndrimi ulur me 30 minuta aktivitet fizik me intensitet mesatar, si ecja me ritëm normal, u lidh me një ulje prej 8% të rrezikut.
- Ndërsa zëvendësimi i vetëm pesë minutave pasivitet me pesë minuta aktivitet fizik intensiv çdo ditë u shoqërua me një ulje prej 22% të rrezikut, sipas studimit.
Megjithatë, studiuesit theksojnë se kërkimi kishte disa kufizime. Analiza u bazua në një studim vëzhgues, ndaj nuk mund të provojë me siguri se qëndrimi ulur është shkaku i drejtpërdrejtë i rritjes së rrezikut të kancerit.
Profesori Kevin McConway, profesor emeritus i statistikës së aplikuar në Open University, i cili nuk ishte pjesë e studimit, tha se gjetjet janë interesante, por nevojiten kërkime të mëtejshme për t’i konfirmuar ato.
/skyweb.al
