Financimi për Policinë e Shtetit rritet me 701 mln lekë përmes Aktit Normativ të Buxhetit 2026.
Ministri i Punëve të Brendshme, Besfort Lamallari, bëri të ditur se fondet shtesë do të përdoren për mbështetjen e efektivëve, investime në teknologji dhe modernizimin e mëtejshëm të Policisë së Shtetit.
Në një postim në rrjetet sociale, Lamallari tha se rritja e financimit synon forcimin e institucionit dhe përmirësimin e kapaciteteve të tij.
Sipas tij, paratë shtesë do të shkojnë për pagat e punonjësve të Policisë së Shtetit, investime në teknologji, motivimin e strukturave elitare dhe përshpejtimin e procesit të modernizimit sipas standardeve evropiane.
“Përmes Aktit Normativ të Buxhetit 2026, rrisim me 701 milionë lekë financimin për Policinë e Shtetit. Më shumë mbështetje për pagat e efektivëve, më shumë investime në teknologji, më shumë motivim për strukturat elitare dhe një tjetër hap i vendosur drejt modernizimit sipas standardeve më të mira evropiane”, u shpreh ministri.
Lamallari theksoi se një polici më e fortë do të thotë një Shqipëri më e sigurt.
“Ky është angazhimi ynë dhe do ta çojmë përpara me vendosmëri”, shtoi ai.
Sipas ministrit, financimi në rritje është pjesë e angazhimit të qeverisë për një Polici të Shtetit më të aftë, më moderne dhe më të pajisur për sfidat e sigurisë.
Ai tha se qëllimi është mbrojtja e jetës, pronës dhe rendit publik.
Ndërkohë, të dhënat për investimet në mbrojtje tregojnë se buxheti i këtij sektori është rritur nga 24.1 miliardë lekë në vitin 2020, në 52.6 miliardë lekë në vitin 2025.
Për vitin 2026, buxheti për mbrojtjen ka arritur në 69.2 miliardë lekë.
