Gjykata e Posaçme ka vendosur pushimin e çështjes penale ndaj ish-kreut të Komisionit të Prokurimit Publik, Jonaid Myzyraj, dhe personave të tjerë të hetuar në të njëjtin procedim.
Vendimi është marrë pas kërkesës së SPAK, e cila kërkoi pushimin e hetimeve me argumentin se nuk janë evidentuar elementë të mjaftueshëm për vijimin e akuzës.
Më herët, GJKKO i kishte lënë Prokurorisë së Posaçme një afat prej 45 ditësh për administrimin e një akti ekspertimi të kryer nga ekspertë të licencuar.
Edhe pas përfundimit të këtij procesi, SPAK arriti në përfundimin se nuk rezultonin shkelje penale nga ana e Myzyrajt.
Përveç tij, SPAK kërkoi pushimin e çështjes edhe për Vilma Zhupaj, Lindita Skeja, Merita Zeqaj dhe Enkeleda Bega, kërkesë që u pranua nga gjykata.
Ish-kreu i KPP-së ishte marrë i pandehur në qershor 2025 për veprën penale “shkelja e barazisë së pjesëmarrësve në tendera apo ankande publike”.
Në të njëjtin procedim ishin nën hetim edhe anëtarët e Komisionit të Prokurimit Publik.
Çështja lidhej me një procedurë prokurimi të Autoritetit Rrugor Shqiptar, me fond mbi 219 milionë lekë, për mirëmbajtjen e rrugës që kalon nga Rrësheni në Shpal dhe zona të tjera përreth.
Sipas dyshimeve fillestare, gjatë shqyrtimit të kësaj procedure, Komisioni i Prokurimit Publik kishte favorizuar në mënyrë të paligjshme bashkimin e dy operatorëve ekonomikë.
Nga hetimet ishte pretenduar se operatorët kishin paraqitur dokumente të falsifikuara.
Megjithatë, pas veprimeve hetimore dhe ekspertimit të administruar, SPAK kërkoi pushimin e çështjes, duke vlerësuar se nuk kishte bazë të mjaftueshme për vijimin e akuzës.
Me vendimin e GJKKO-së, procedimi penal ndaj Myzyrajt dhe të pandehurve të tjerë konsiderohet i pushuar.
