Drejtoria e Përgjithshme e Tatimeve ka bërë të ditur se po vijon procesi i fshirjes automatike të detyrimeve tatimore për tatimpaguesit përfitues.
Sipas njoftimit, deri tani janë fshirë ose shuar detyrime në vlerën 313 milionë euro.
Nga ky proces kanë përfituar 121,630 tatimpagues, ndërsa fshirja e detyrimeve vijon për të gjithë subjektet që plotësojnë kushtet e ligjit nr. 86/2025.
Tatimet bëjnë të ditur se nga data 10 qershor 2026 kanë nisur edhe pagesat për përfitimin nga falja me kusht e detyrimeve tatimore, gjobave dhe kamatëvonesave.
Për detyrimet e periudhës 2015–2019, tatimpaguesit përfitojnë fshirje të 50% të detyrimit principal dhe fshirje të plotë të gjobave e kamatëvonesave, nëse 50% e mbetur është paguar njëherësh nga 10 deri më 30 qershor 2026.
Për të njëjtën periudhë, përfitohet fshirje e 25% e detyrimit principal dhe fshirje e plotë e gjobave e kamatëvonesave, nëse 75% e mbetur paguhet nga 10 qershori deri më 31 dhjetor 2026.
Ndërsa për periudhën 2020–2024, përfitohet fshirje e plotë e gjobave dhe kamatëvonesave, me kusht që të paguhet 100% e detyrimit principal deri më 31 dhjetor 2026.
Procesi është pjesë e skemës së faljes tatimore, e cila synon lehtësimin e barrës së vjetër fiskale për bizneset dhe individët debitorë.
Drejtoria e Tatimeve njofton se fshirja automatike do të vijojë për të gjithë tatimpaguesit përfitues sipas përcaktimeve ligjore. /skyweb.al
