Kryeministri Edi Rama ka reaguar për fshirjen e vlerësimeve negative që, sipas tij, janë vendosur në mënyrë të organizuar ndaj bizneseve shqiptare në Google, duke thënë se autoritetet shqiptare kanë bashkëpunuar me kompaninë për rikthimin e faqeve të dëmtuara.
Në një postim në Facebook, Rama e cilësoi ngjarjen si një “turp alla shqiptarçe”, duke e përshkruar atë si një “bllokë terrori digjital” të organizuar përmes rreth 10 mijë llogarive të rreme.
Sipas kryeministrit, këto llogari kanë ndërmarrë një “sulm të padëgjuar kriminal” ndaj hoteleve, bujtinave dhe restoranteve, duke hequr me “dhunë” vlerësimet pozitive të klientëve dhe duke dëmtuar reputacionin e bizneseve.
“Jehona e një TURPI ALLA SHQIPTARÇE arriti deri në majën e piramidës së Google, ku autoritetet tona kërkuan ndihmë për të nxjerrë një seri sipërmarrjesh nga BLOZA E TERRORIT DIGJITAL”, shkruan Rama.
Ai shton se “Policia vijon me hetimin e skemës kriminale”, ndërsa falë bashkëpunimit me Google, faqet e sipërmarrjeve po rikthehen në gjendjen e mëparshme.
Reagimi i kryeministrit vjen pas rastit të biznesit të Gjergj Lucës dhe subjekteve të tjera, të cilat u përballën me një valë vlerësimesh negative në Google. Sipas Ramës, këto nuk ishin komente reale të klientëve, por pjesë e një fushate të koordinuar për të dëmtuar bizneset shqiptare.
